ტელეკომპანია “კავკასიას” გენერალური დირექტორი, ნინო ჯანგირაშვილი მთავრობის მეთაურის, ირაკლი კობახიძის პარლამენტში გამოთქმულ მოსაზრებებს კონკრეტული მინიშნებებით და (არა)რიტორიკული შეკითხვებით ეხმაურება:
“კობახიძემ პარლამენტში კიდევ ერთხელ განავითარა ლოგიკა – უფრო სწორად, ორი პარალელური „ლოგიკური“ ხაზი, რომლებსაც „ქართული ოცნება“ ბოლო წლებია ავითარებს.
1. უკრაინაში ომის დაწყების შემდეგ აღმოსავლეთ-დასავლეთის ტრადიციული სატრანზიტო მარშრუტები ჩაიკეტა და ევროპისთვის ერთადერთ მთავარ უსაფრთხო გზად დარჩა შუა დერეფანი საქართველოს გავლით. ამიტომ, მათი თქმით, ევროპას საქართველო ძალიან სჭირდება – იმდენად, რომ ჩვენ თითქოს უფრო მნიშვნელოვანი ვართ ევროპისთვის, ვიდრე ევროპა ჩვენთვის.
2. იმავე ომის დაწყების შემდეგ, იგივე ევროპა, „დიფ სთეითთან“ ერთად, საქართველოს ომში ჩათრევას ცდილობს, გვთხოვდა „მეორე ფრონტის“ გახსნას და ქართულ ოცნებას სწორედ მას შემდეგ გადაეკიდა, რაც ის არ დანებდა, საქართველო რუსეთთან ომში არ ჩართო და ქვეყანაში „ცეცხლი არ ააგიზგიზა“.
ამოცანა გვეკითხება:
თუ საქართველო ევროპისთვის პრაქტიკულად ერთადერთ უსაფრთხო სატრანზიტო დერეფანად დარჩა რეგიონში, რატომ უნდოდა ევროპას ამ უსაფრთხო დერეფნის ომის ზონად გადაქცევა და დესტაბილიზაცია?
სად კვეთს ეს ორი “ლოგიკური ხაზი“ ერთმანეთს?
ვინც ამ კთხვაზე სწორ პასუხს გასცემს, საჩუქრად გადაეცემა მარგარიტა სიმონიანის წიგნი ავტოგრაფით“, – წერს ნინო ჯანგირაშვილი ფეისბუქის პირად გვერდზე.
