„ახალი საქართველოს“ ლიდერი გიორგი ვაშაძე, პარტიის ადგილობრივ წევრებთან ერთად წყალტუბოში იმყოფებოდა. მან სასტუმრო სანატორიუმი დაათვალიერა და მედიასთან „ქართული ოცნების“ მიერ შეჩერებულ პროექტებზე ისაუბრა. მისი თქმით, ხელისუფლებამ მოსახლეობა მოატყუა და არცერთი დაპირებული მასშტაბური პროექტი არ განახორციელა. ერთ-ერთ ასეთ მაგალითად ვაშაძემ წყალტუბოს რესტავრაციის პროექტი დაასახელა.
„გასულ წელს ჩვენ მოვისმინეთ ბიძინა ივანიშვილის 29 ოქტომბერის განცხადება, რომლის მიხედვითაც ის წყალტუბოს პროექტს თავის თავზე იღებდა. სამწუხაროდ, ეს ივანიშვილის და “ქართული ოცნების” კიდევ ერთი ბლეფი აღმოჩნდა, რადგან დღეს ყველა ვხედავთ აქ რაც ხდება.
ჩვენ უნდა გავაკეთოთ ერთი არჩევანი – ან საქართველო გავხადოთ რეგიონის ლიდერი, ან დავრჩეთ ივანიშვილის საქართველოში, რომელიც არის გაჭირვებული და სადაც მუდმივად გვატყუებენ.
დღეს გვაქვს ათობით გაჩერებული პროექტი, მაშინ როცა მხოლოდ წყალტუბოს რეაბილიტაციაზე 350 მილიონი დოლარი უნდა დახარჯულიყო. მეტიც, საკრებულოს ყოფილი თავმჯდომარე ციხეში ზის, რადგან ინვესტორებზე მუშაობდა და როგორც ჩანს, პირადად ივანიშვილის ინტერესები გადაკვეთა,რის გამოც დასაჯეს, 11 წელი მიუსაჯეს. მთავარი ის არის, რომ ეს კატასტროფა, რაც დღეს ხდება უნდა დამთავრდეს. ამხელა პოტენციალის ქვეყანა არ შეიძლება მშიერი იყოს.
თუ ვინმე იტყვის, რომ პროექტები კოვიდის გამო შეფერხდა, ესეც მორიგი ტყუილი იქნება, რადგან წყალტუბოში სამშენებლოდ ჩამოსული ჯგუფი არავის უნახავს,“ -განაცხადა გიორგი ვაშაძემ.
შეგახსენებთ, ქართული ოცნების” თავმჯდომარემ ბიძინა ივანიშვილმა 2019 წლის 29 ოქტომბერს განცხადება გააკეთა, რომლის თანახმად, წყალტუბოში მდებარე 22 სასტუმროს და 9 აბანოს გამოსყიდვას და კურორტის რეაბილიტაციას დაიწყებდა.
ყოფილი პრემიერის თქმით, წყალტუბო უახლოეს წლებში, აღმოსავლეთ ევროპის უმნიშვნელოვანესი მიზიდულობის ადგილი უნდა გამხდარიყო, რომელიც ბაზარზე ცენტრალური ევროპის დიდ მოთამაშებს გაუწევდა კონკურენციას.
აღნიშნული პროექტით კი რეგიონში 15 000 – 20 000 ადამიანი დასაქმდებოდა.
ლიკა დევდარიანი
სააგენტო “პარალელის”
რეგიონალური კორესპონდენტი