“🐝 ფუტკრის საერთაშორისო დღეს ვისაუბროთ უნიკალურ ქართულ მთის რუხ ფუტკარზე” – ველური ბუნების ეროვნული სააგენტოს მორიგი საინტერესო მასალა:
ქართული მთის რუხი ფუტკარი, ასევე ცნობილი როგორიც კავკასიური რუხი ფუტკარი (Apis mellifera caucasica), მსოფლიოში აღიარებული ფუტკრის უნიკალური ჯიშია.
იგი მეფუტკრეებს შორის განსაკუთრებული პოპულარობით სარგებლობს, რასაც მისი არაერთი გამორჩეული ბიოლოგიური თვისება განაპირობებს.
ყველაზე მთავარი ნიშანი, რითაც ქართული ფუტკარი მსოფლიოში პირველობას არავის უთმობს, მისი გრძელი ხორთუმია. ამ უპირატესობის წყალობით, მას შეუძლია ნექტარი ისეთი ღრმაყვავილოვანი მცენარეებიდანაც კი მოიპოვოს, რომლებიც სხვა ჯიშის ფუტკრებისთვის მიუწვდომელია.
ხორთუმის სიგრძის გარდა, ქართული ფუტკარი მსოფლიოში განთქმულია:
• მშვიდი ხასიათით, რაც საგრძნობლად აადვილებს მასთან მუშაობას;
• უდიდესი შრომისმოყვარეობით და ეფექტიანობით – ქართულ რუხ ფუტკარს ახასიათებს ნექტრის აქტიური ძიება და ღალიანობის (ყვავილებიდან ნექტრის აღების პერიოდის) მაქსიმალურად ეფექტიანი გამოყენება.
აღსანიშნავია ისიც, რომ ქართული მთის რუხი ფუტკარი მსოფლიო გამოფენებზე სამჯერ იყო წარდგენილი და სამივეჯერ ოქროს მედალი დაიმსახურა.
