ველური ბუნების ეროვნული სააგენტოს კიდევ ერთი საინტერესო მასალა საქართველოს ფლორის საინტერესო წარმომადგენელზე – უხრავი (Ostrya):
❓ იცოდით, რომ საქართველოს ფლორის წარმომადგენელი ეს მცენარე სახელით თავის მთავარ მახასიათებელზე, მერქნის სიმტკიცეზე მიგვანიშნებს?
უხრავი (Ostrya) არყისებრთა ოჯახის გამორჩეული და იშვიათი წარმომადგენელია. მსოფლიოში ამ მცენარის 10-მდე სახეობაა ცნობილი (ძირითადად ჩრდილოეთ ნახევარსფეროში), თუმცა კავკასიასა და საქართველოს ველურ ბუნებაში მხოლოდ ერთი სახეობა ბინადრობს – ჩვეულებრივი ანუ რცხილაფოთოლა უხრავი (Ostrya carpinifolia).
უხრავის მერქანი მკვრივი და მაგარია, რის გამოც მას ხშირად „რკინის ხესაც“ უწოდებენ. ის საოცრად მდგრადია ლპობისა და ცვეთის მიმართ. ძველად საქართველოში უხრავისგან ამზადებდნენ წისქვილის ღერძებს და საურმე ხელსაწყოებს. მისი მერქნის გაცვეთა თითქმის შეუძლებელია.
უხრავი აღწევს 15-20 მეტრს. აქვს დახეთქილი, ქერცლოვანი ქერქი. მისი მოკლეყუნწიანი ფოთლები, ძალიან ჰგავს რცხილის ფოთლებს. აქედანაა მისი ლათინური სახელწოდებაც – carpinifolia.
იზრდება შერეულ ფოთლოვან ტყეებში. საქართველოში შედარებით ხშირად გვხვდება მესხეთში, იმერეთში, აჭარასა და აფხაზეთში.
უხრავს ძლიერი და ღრმა ფესვთა სისტემა აქვს. ვინაიდან ის ხშირად მშრალ, კლდოვან და ციცაბო ფერდობებზე იზრდება, მას უდიდესი ნიადაგდამცავი ფუნქცია აკისრია. ის საიმედოდ აკავებს მიწას და იცავს ფერდობებს ეროზიისა და მეწყრული პროცესებისგან.
