“სანამ ოპოზიციის ერთიანობაზე ვისაუბრებთ, კარგად უნდა გავიაზროთ, რა მოხდა წლინახევრის წინ” – ზაზა ბიბილაშვილი

პოლიტიკური ერთიანობის თემას, სოციალურ ქსელში, 3-პუნქტიანი შეფასება-განმარტებებით ეხმიანება ჭავჭავაძის კვლევითი ცენტრის დამფუძნებელი ზაზა ბიბილაშვილი:

“მოკლედ ერთიანობის თემაზე:

პირველი – სანამ ოპოზიციის ერთიანობაზე ვისაუბრებთ, კარგად უნდა გავიაზროთ, რა მოხდა წლინახევრის წინ და რატომ არ შედგა ერთიანობა 2024 წლის არჩევნებამდე. ვინ და რა იყო ამის მიზეზი? “შეცდომა” იყო ეს თუ ვიღაცის წინასწარ განსაზღვრული დღის წესრიგის ნაწილი? ამ კითხვებზე გულწრფელი პასუხები დაგვეხმარება კონკრეტული ძალების მოტივაციის დადგენაში, რაც არსებითია დღევანდელი დისკუსიებისთვის.

მეორე – “ერთიანობა” არ უნდა იყოს პოლიტიკური მეინსტრიმიდან დემოკრატიულად განდევნილი ოდიოზური ფიგურების უკანა კარიდან დაბრუნების გზა (როდესაც კონკრეტული არაელექტორალური ტიპები კაბინეტური გარიგებებით ცდილობენ თავში მოექცნენ ხალხის დიდ მასას, რომელთანაც არანაირი ქიმია არ გააჩნიათ). დიახ, ხალხი ბრძენია და ამას არ მიიღებს, არანაირი “ერთიანობის” ყალბი საბაბით.

მესამე და მთავარი – პოლიტიკის ოქროს წესია, რომ “ამომრჩეველი ყოველთვის მართალია” (ისევე, როგორც ბიზნესში მომხმარებელია ყოველთვის მართალი). როცა ამომრჩეველთან შედიხარ ჭიდილში და უბრალო ტიპებს უწყებ ხმალაობას, იქ პოლიტიკოსი აპრიორი წაგებულია, სულ რომ ცამდე მართალი იყოს ამა თუ იმ კონკრეტულ არგუმენტში.

ასეა ეს. და გმადლობთ ყურადღებისთვის“, – წერს ზაზა ბიბილაშვილი.