“ვფიქრობ, ჩრდილოეთ ოსეთთან ცხინვალის გაერთიანება რომ იგეგმებოდეს, პუტინის რიტორიკა სხვანაირი იქნებოდა” – ზაალ ანჯაფარიძე

9 მაისს რუსეთსა და მის მიერ ოკუპირებულ ცხინვალს შორის ახალი ხელშეკრულების გაფორმებასთან დაკავშირებით შეფასება-განმარტებებს აკეთებს ანალიტიკოსი, ზაალ ანჯაფარიძე:

“დიდი ხმაური და ზოგჯერ პროვოკაციული ხმაური ატყდა 9 მაისს რუსეთსა და მის მიერ ოკუპირებულ ცხინვალს შორის ახალი ხელშეკრულების გაფორმებაზე, რაც ანექსიისკენ კიდევ ერთ ნაბიჯად შეფასდა.

როდესაც ცხინვალის ე.წ. “პრეზიდენტი” პუტინთან შეხვედრაზე პოლიტიკურს აწვებოდა, “ოსი ერის გაერთიანებაზე” და ა.შ. პუტინმა ეს ყბედობა “გაატარა” და უთხრა, რომ ახალი შეთანხმება გულისხმობს მეტწილად სამართლებრივ-ნორმატიული ბაზის გაუმჯობესებას, უპირველეს ყოვლისა სოციალურ-ეკონომიკურ სფეროში. ამ შემთხვევაში იმას კი არა აქვს მნიშვნელობა, რას ამბობს ვასალი, არამედ რას ამბობს პატრონი, სუზერენი.

არ მაქვს პრეტენზია ჭეშმარიტებაზე, მაგრამ ვფიქრობ, ჩრდილოეთ ოსეთთან ცხინვალის გაერთიანება რომ იგეგმებოდეს, პუტინის რიტორიკა სხვანაირი იქნებოდა და ცხინვალშიც და მოსკოვშიც გარკვეული სამზადისები და მოძრაობები დაიწყებოდა“, – წერს სოციალურ ქსელში ზაალ ანჯაფარიძე.