ფასებთან საკითხთან დაკავშირებით მიმდინარე მსჯელობებს თუ შეფასებებს, კონკრეტული პოზიციით და დეტალური განმარტებებით, ეხმაურება განათლების ყოფილი მინისტრი, ილიას სახელმწიფო უნივერსიტეტის პროფესორი, პოლიტოლოგი გია ნოდია:
“ფასების საკითხებით პოლიტიკური მანიპულაციები საცოდავ შთაბეჭდილებას ტოვებს და აჩვენებს, რომ ეკონომიკის ელემენტარულ ჭეშმარიტებებზე ადამიანთა უბრავლესობას ძალიან ბუნდოვანი წარმოდგენა აქვს.
პირადად კვლევები არ ჩამიტარებია, მაგრამ დასავლეთევროპულ სუპერმარკეტებში გამივლია და მჯერა, რომ ტიპური სასურსათო კალათა იქ უფრო ძვირი იქნება, ვიდრე მსგავსი კლასის ქართულ სუპერმარკეტში (ასევე ეჭვი არ მეპარება, რომ რაღაც სპეციფიკური პროდუქტი ჩვენთან უფრო ძვირია – მაგალითად, ხანდახან ყავა იქიდან ჩამომაქვს, იმიტომ რომ უფრო იაფია).
ამ საკითხზე ხელისუფლებასთან ჭიდაობა მაინცდამაინც ჭკვიანური არ მგონია. თუ რამეს ამტკიცებ, კონკრეტული რიცხვები უნდა მოიტანო სწორედ კალათის დონეზე. არ არის რთული – აიღე საბაზისო პროდუქტების სია, შედი იმათ კარფურში და შენსაში (მაგალითად) და დაითვალე.
ცხადია, რომ მათი ხელფასები მრავალჯერ მაღალია, მაგრამ ეს ზოგადად ეკონომიკური განვითარების საკითხია და არა კონკრეტულად ფასების. ფასებს ვერ დააძალებ, მომხმარებლის შესაძლობლობებს შეეწყოს. ვიცით, რომ ევროპაში ჩვენზე უკეთ ცხოვრობენ და ვერც ერთი მთავრობა ამას ერთბაშად ვერ შეცვლის. ვიცი, რომ ზოგადად უვარგისი მთავრობა გვყავს, მაგრამ ამაზე არ უნდა ედავო.
მაგრამ მთავრობის ჩარევები ვითომ პროდუქტების გაიაფების მიზნით და მერე სუპერმაკეტების საზეიმო (მაგრამ ბუნდოვანი) განცხადებები, მთავრობის ხათრით რაღაცეებს გავაიაფებთო, ფარისევლoბის და დემაგოგიის მწვერვალია. მთავრობაც და ბიზნესიც სრულ უსირცხვილობას იჩენენ იმ იმედით, რომ ხალხი ბნელია და რასაც გინდა დააჯერებ.
ჰიპოთეტურად სავსებით ვუშვებ, რომ არსებობს რაღაც კარტელური გარიგებები და ფასები ხელოვნურად ნარჩუნდება უფრო მაღალ დონეზე, ვიდრე ბაზრის ლოგიკა მოითხოვს. მაგრამ ზოგადად თქმა, რომ შეიძლება ასე იყოს, არაფრის მომცემია. თუნდაც თუ ეს მართალია, არაფრიდან ჩანს, მთავრობას ჰქონდეს უნარი ან ინტერესი, ამას რაიმე უშველოს – ან ალტერნატულ ძალას ჰქონდეს მდგომარეობის გამოსწორების კონკრეტული გეგმა (გადასახადების დაწევის უნივერსლურ რეცეფტს არ ვგულისხმობ)“, – წერს გია ნოდია ფეისბუქის პირად გვერდზე.
