საქართველოს დამოუკიდებლობის დღე წელს რუსთავში მასშტაბური ღონისძიებების გარეშე ჩაივლის, რაც პანდიმიით არის გამოწვეული. თუმცა დამოუკიდებლობის დღე ქალაქს მაინც დაეტყო, რუსთავის ქუჩები დილიდან საქართველოს დროშებით არის მორთული, ასევე ტრადიციულად რუსთაველებმა საკუთარი აივნებიდანაც გადმოფინეს დროშები.
დილით, კი ანსამბლმა ,,თუთარჩელამ“ ქალაქის მთავარ მოედანზე, საქართველოს ჰიმნი შეასრულა. ქალაქის მერმა კი რუსთაველებსა და საქართველოს თითოეულ მოქალაქეს ეროვნული დღე მიულოცა:
,,მთავარ ეროვნულ დღესასწაულს – დამოუკიდებლობის დღეს ვულოცავ რუსთაველებსა და საქართველოს თითოეულ მოქალაქეს, მათ, ვისთვისაც ძვირფასია ჩვენი ქვეყნის წარსული, აწმყო და მომავალი.
განსაკუთრებით ვულოცავ ამ დღეს ჯარისკაცებს, რომლებიც საკუთარი სიცოცხლის ფასად იცავენ სამშობლოს, სამშვიდობო მისიების მონაწილე ჩვენს საამაყო სამხედროებს, რომელთაც უდიდესი პასუხისმგებლობა აკისრიათ. მინდა უღრმესი პატივისცემით გავიხსენო საქართველოს ტერიტორიული მთლიანობისთვის დაღუპული გმირები და ქედი მოვიხარო მათი სახელების წინაშე. ქვეყნის დამოუკიდებლობა, ყველაზე დიდი მონაპოვარია, რომელსაც მოფრთხილება და დაცვა სჭირდება, ეს დღე ჩვენია!“- განაცხადა ირაკლი ტაბაღუამ.
ავტორი
თამთა ასლანიშვილი