“ამ ბრალდებებით ივანიშვილი ცდილობდა შიშის გაღვივებას, საპასუხოდ მიიღო შეუპოვრობა და დაცინვა” – მიხეილ სააკაშვილმა

მიხეილ სააკაშვილი 23 თებერვალს თბილისის საქალაქო სასამართლოში გამართული სხდომის მძიმე შეფასებებს ახდენს:

“გუშინწინდელი “სასამართლო პროცესი” “საბოტაჟის საქმეზე” ისეთი მაგარი კომედიური შოუ იყო, რომ საკუთარი თვალით უნდა ნახო, რომ დაიჯერო.

მთელი დარბაზი “სასამართლოს” თითქმის მთელი დრო ხმამაღლა იცინოდა.

სიტუაცია ბოლომდე აირია მას შემდეგ რაც ულტრა ქოცმა ქალმა “მოსამართლემ”, რომელიც ორი წლის წინ ნ. გვარამიას 12 წლამდე პატიმრობას ითხოვდა, შვილების სამსახურეობრივი მანქანით ტარების გამო, აკანკალებული გამკივანი ხმით მე მომმართა “ბატონო მიხეილ, გთხოვთ გამიმეოროთ თქვენი სახელი“.

მე ვუპასუხე “მიხეილ ზვიგენთა რისხვა” (მე ხომ ივანიშვილის ზვიგენთან სელფის გადაღების სურვილის გამო უსასრულოდ მიგრძელებენ ციხის ვადას).

ამაზე გია ბარამიძემ ხმამაღლა იყვირა, რომ სასამართლო კი არა სრული ცირკია. მას მანდატურები ეცნენ, შემდეგ ხალხი კიდევ მეტად ახმაურდა და “მოსამართლემ” პროცესი “დახურულად” გამოაცხადა, ე.ი. მას ვეღარ დაესწრება ვერავინ, მათ შორის, უცხოელები და მედია. ე.ი. ჩვენი საჯარო გამონათქვამების გამო გაგვასამართლებენ არასაჯაროდ, სრულიად საიდუმლოდ.

ამ ბრალდებებით ივანიშვილი ცდილობდა შიშის გაღვივებას, საპასუხოდ მიიღო შეუპოვრობა და დაცინვა.

და კიდევ ერთი იმდენად კატასტროფული “მოსამართლე” იპოვეს, რომ აშკარაა ამ მონურ მოსამართლეთა კორპუსში, რომელსაც ივანიშვილი ყოველ თვეს კონვერტით უხდის ფულს, აშკარად გაუჭირდათ “ზვიგენის” საქმეებზე ხელის მომწერის პოვნა“, – განაცხადა მიხეილ სააკაშვილმა.