საქართველოს პროკურატურამ, საგანგებო ბრიფინგზე, გიგა ავალიანის საქმეში მონაწილე არასრულწლოვანების მიერ არაერთი ჩადენილი დანაშაულის დამადასტურებელი ფაქტები გაასაჯაროვა და მათ ბრალი დაუმძიმა. შვილმოკლული დედის, ეკა კუპატაძის მიმართ თანაგრძნობას და მხარდაჭერას გამოხატავს შვილმოკლული მამა, მალხაზ (ვახა) მაჩალიკაშვილი და მისი შვილის, თემირლანის, ასევე სხვა მოკლულ ახალგაზრდებთან დაკავშირებითაც სამართალის აღსრულებას მოითხოვს:
“ამ ქალბატონის საცოდავობით სული მტკიოდა.
დარწმუნებული ვარ დღეს ამ ქალბატონის სული რამდენადმე დამშვიდება, მაგრამ შვილს ვერ დაიბრუნებს, ის ტკივილი კი სამუდამოდ გაყვება.
რომ წავიკითხე მისი კომენტარი, სადაც პროკურტურას მადლობას უხდის იმისთვის, რომ გამოიძია მისი შვილის მკვლელობის საქმე, ალბათ ხელისუფლებას უხდიდა მადლობას, პროკურატურა ხომ ამ მახინჯი სისტემის განუყრელი ნაწილია.
ასე თუ ისე ხომ გამოიძიეს რა მნიშნელობა აქვს.
აქვე ამ საქმის ირგვლივ დამხვდა რამოდენიმე კომენტარი, სხვა საქმის შესახებაც. ერთ ერთი არის, სადაც საუბრობენ თემირლანის საქმეზე… პატიოსანი და სამართლიანი საზოგადოების ნაწილს ყველაფერი ახსოვთ, ბევრმაც მიმართა ამ პატიოსან პროკურატურას რატომ არაა თემირლანის საქმის გამოძიებულიო.
ხოდა მეც გადავწყვიტე მეთქვა ამ საქმესთან დაკავშირებით რამოდენიმე სიტყვა.
თემირლანი ქუჩაში, ქუჩის ღლაპებს არ მოუკლავთ, თემირლანი იმ პროკურატურამ მოკლა ვისზეც დღეს ჩვენ ვსაუბრობთ.
თემირლანი სასამართლო სისტემამ მოკლა, თემირლანი სახელმწიფომ ხელისუფლებამ მოკლა და არა მარტო თემირლანი, თამარ ბაჩალიაშვილიც, ნიკო კვარაცხელიაც ამიტომაც მეგობრებო, ამ რამოდენიმე მკვლელობას და სასტიკ დანაშაულს ვერ გამოიძიებენ – ერთს ხელყუმბარა ჩაუდგეს გამთენიისას ლოგინში, მეორეს კი ავტომობილი ჩაუდეს ტყეში, ასევე იმ მაგარი ბიჭის კვარაცხელიას ამბავი…
ასეა ეს, იბრძოლე რამდენიც გინდა.
მიხარია ქალბატონო, თქვენმა ბრძოლამ შედეგი რომ დადო, გამძლეობას გისურვებთ“, – წერს მალხაზ (ვახა) მაჩალიკაშვილი სოციალურ ქსელში.
