საპროტესტო მოძრაობა ,,300 ქალის“ ინიციატივით მონუმენტთან ,,საქართველოს მატიანე“ პერფორმანსი გაიმართა და განცხადება გავრცელდა:
“ჩვენ შევიკრიბეთ სიმბოლურად მონუმენტთან „საქართველოს მატიანე“, რომელიც ეძღვნება საქართველოს ისტორიას.
და ახლა, როცა იწერება ჩვენი ქვეყნის თანამედროვე ისტორია, მთავარ როლში არიან ჩვენი სინდისის პატიმრები, პოლიტპატიმრები. რეჟიმს ამჟამად ტყვეობაში ჰყავს 120-ზე მეტი ადამიანი… სამწუხაროდ ჯერ მხოლოდ ათამდე ადამიანის განთავისუფლება მოხერხდა უკანონო პატიმრობიდან…
დიახ, სწორედ რეჟიმის ტყვეების სიმტკიცეა ჩვენთვის სამაგალითო, ვინც თავისი ცხოვრების ათასობით საათს გისოსებს მიღმა ატარებს, მაგრამ მაინც სჭექს მათი ბრძოლის და თავისუფლების ხმა ციხიდან.
ჩვენ ამ პერფორმანსით, როგორც მეხსიერების აქტით, გამოვხატავთ მადლიერებას მათ მიმართ, ვინც საკუთარი თავისუფლება ჩვენს თავისუფალ მომავალს შესწირა.
ჩვენ ვეუბნებით მადლობას გოგოებს და ბიჭებს, ქალებს და კაცებს, ვინც ციხის კედლებში არიან გამოკეტილნი, მაგრამ შინაგანად არ დამარცხებულან. მათი სიმტკიცე დღეს ქვეყნის სინდისის საზომი და ჩვენი პასუხისმგებლობაა!
„საქართველოს მატიანე“ გვიყვება იმ გმირებზე, რომლებმაც ისტორიის გზაზე მძიმე ფასი გადაიხადეს. ამ სივრცეში დგომით ვამბობთ, რომ დღევანდელი რეჟიმის ტყვეები ამ მატიანეს ცოცხალი გაგრძელებაა.
დღეს ჩვენ გვინდა გითხრათ მადლობა თქვენი ისტორიული ბრძოლისთვის! როგორც ეს მონუმენტი ინახავს წარსულს, ასე შეინახავს საქართველო თქვენ სახელებს, როგორც თავისუფლებისთვის ბრძოლის ფასს და ღირსების ისტორიას.
საქართველო ევროპის ნაწილია. გვჯერა და გვწამს რომ ქართველი ხალხის უწყვეტი ბრძოლა ევროპული მომავლისთვის გამარჯვებით დასრულდება. მანამ კი გაიგონეთ ყველგან მსოფლიოს ცივილიზებულ სამყაროში ჩვენი, რეჟიმის ტყვეების ხმა, ეს არის თავისუფლებისთვის ისტორიული ბრძოლის ხმა და მეტად გაგვაგონეთ თქვენი ხმაც!” – ნათქვამია გავრცელებულ განცხადებაში.
ინფორმაციას მოძრაობა “300 ქალი” ავრცელებს
