“ნუ შევუწყობთ ხელს რუსების შექმნილ კლიშეების განვრცობას” – ბეჟან ჯავახია

ისტორიის გაგების, იდეოლოგიის გავლენის, ქვეყანაში არსებული პოლიტიკური რეალობის თუ გემოვნება/ინტერესის შესახებ საუბრობს საქართველოს რესპუბლიკის პირველი მოწვევის უზენაესი საბჭოს წევრი, საქართველოს დამოუკიდებლობის აქტზე ხელმომწერი, ისტორიკოსი, პროფესორი ბეჟან ჯავახია და დღევანდელ რეალობაზე აკეთებს აქცენტს:

“სრულიად მარტივი რამის დაწერა მიწევს… ვფიქრობ ეს ჩვენს მეხსიერებაში ისევ საბჭოთა იდეოლოგიიდან მოდის და ვწუხვარ, რომ ამ აზროვნების გავლენა ისევე ეტყობა ახალგაზრდებსაც, როგორც ჩემს თაობას.

1. სრულიად დიდი გაუგებრობაა ჩვენი უახლესი ისტორიის ის გაგება, რომელიც დღემდე არსებობს, ის რომ გავატოლეთ ერთმანეთთან ბოლშევიკები და სოციალ დემოკრატები: ჟორდანია, რამიშვილი და ფილიპე მახარაძე, სერგო ორჯონიკიძე. ასევე გავატოლეთ ერთმანეთთან მრგვალი მაგიდა, ზვიად გამსახურდიას მეთაურობით და შემდეგი კრიმინალური რეჟიმი კიტოვანი, სიგუას და იოსელიანი შევარდნაძის მეთაურობით და ის რაც ახლა ხდება: გაატოლოთ ერთმანეთთან ერთიანი “ნაციონალური მოძრაობა” მიხეილ სააკაშვილის ხელმძღვანელობით და ქოცური რეჟიმი ივანიშვილის მეთაურობით;

2. სრულიად გაუგებარია, როდესაც პოლიტიკოსები წერენ: ნაციონალურმა მოძრაობა უკვე გადაირჩია მოსახლეობამ თავისი შეცდომების, თუ გნებავთ დანაშაულების გამო და დღეს არ აქვს უფლება იყოს პოლიტიკაში. იქნებ ერთხელ მაინც გადაგევლოთ თვალი დიდი ქვეყნების ისტორიისათვის და იქ ნახოთ რესპუბლიკელები და დემოკრატები რამდენჯერ აირჩიეს და გადაირჩიეს, ასევე კონსერვატორები და ლეიბორისტების, თუ გნებავთ გერმანიის მმართველი პარტიები!! ცოტა ფრთხილად მოსახვევში. ეს ერთადერთი პარტიაა, რომელიც ქმნის სტაბილური პარტიის სახეს, რომელმაც, როგორც ოპოზიციამ ხელისუფლებიდან წასვლის შემდეგ გაუძლო რამდენიმე არჩევნებს… ეს პოლიტიკური კულტურის ნიშანია ქვეყანაში…;

3. ასეთივე გაუგებრობაა, როდესაც ქუჩაში გამოსული თუ პოლიტიკურ დებატებში მონაწილე სუბიექტები აცხადებენ, რომ პოლიტიკოსები არ გვინდა, ახლა სხვა დრო მოვიდაო. სრულიად მარტივად ამ ცვლილებებში მონაწილე ყველა პოლიტიკას აკეთებს და პოლიტიკური ორგანიზაციების პასუხისმგებლობის გარეშე ცვლილებები ვერ იქნება;

4. როდემდე უნდა ვილაპარაკობთ ბოლშევიკური კლიშეებით: ზვიადისტი, მიშისტი… ისევ იქ ვართ ხომ , როდესაც ბოლშევიკები ხალხის მტრებს ახარისხებდნენ: ტროცკისტები, ბუხარინისტები…

ნუ შევუწყობთ ხელს რუსების შექმნილ კლიშეების განვრცობას. მეგონა უკვე გამოვიდოდით “გლასნოსტის” ეპოქის პერიოდის დანიშნული დისიდენტების ტერმინოლოგიიდან, როდესაც პოლიტიკური ლიდერის მიმდევრებს “ისტებად” მოიხსენიებდნენ და ლიდერებს კი “ბელადებად”…“, – წერს ბეჟან ჯავახია სოციალურ ქსელში.