ქართველი მწერლის, დრამატურგის ლაშა ბუღაძის კონკრეტული შეთავაზებები – ზოგისთვის მოულოდნელი, ზოგისთვის მნიშვნელოვანი და აუცილებელი…:
“ვისაც კი შესაძლებლობა და შანსი აქვს, რომ ივანიშვილის ტყვეობიდან გათავისუფლება სცადოს, ეს უნდა გააკეთოს და ჩვენც უნდა შევუწყოთ ამაში ხელი.
სინდისის პატიმრები გარეთ უნდა იყვნენ და გარეთ უნდა იყვნენ პოლიტიკოსებიც.
რა, განა “კანონიერად” სხედან ციხეში თუ “კანონიერმა” სასამართლომ დააპატიმრა ისინი, რომ ბანდის მიერ “პრეზიდენტად” გამწესებულის კანონიერების აღიარების გვეშინოდეს ამ აქტით?
ბანდა პრაქტიკულ ძალაუფლებას ფლობს და ჩემი აზრით, სწორედ ამის გათვალისწინებით, დასაძრახი იმაში არაფერი მგონია, რომ ყველა გზას მივმართოთ სინდისის პატიმრების დასახსნელად – გნებავთ “შეწყალების” საკითხის დაყენებით და გნებავთ გირაოს გადახდის.
თუნდაც ელენე ხოშტარიასთვის, მაგალითად, რომლის გირაოს შეგროვებაც ისევ და ისევ ჩვენი საზოგადოების ერთობის, სოლიდარობისა და პროტესტში ჩართულობის მაგალითი იქნებოდა (წარმომიდგენია, როგორ გაბრაზდება ახლა თავად ჩემი სიტყვების გამო და არც მიიღებს ალბათ, მაგრამ ისიც და სინდისის პატიმრებიც ჩვენ გარეთ გვჭირდებიან და არა ტყვეობაში, სადაც ამდენი ხანია სხედან უმძიმეს პირობებში).
ივანიშვილი აქრობს საქართველოს და ჩვენი ტრადიციით თუ დისკურსით, გაცნობიერებულად თუ გაუცნობიერებლად რომ გვიზიდავს თვითშეწირვის აქტები – უნებლიეთ კიდევ უფრო მეტად ვუწყობთ ხელს, რომ ამ ქვეყნის პატრიოტებიც “გამქრალები” იყვნენ პოლიტიკური და სოციალური ცხოვრებიდან.
პროტესტის ყველა ეტაპს თავისი შინაარსი აქვს და ახლა ყველაზე მნიშვნელოვანი პატიმრების გათავისუფლება მგონია. ყველა შესაძლო გზით ამ სრულ უკანონობასა და აბსურდში“, – წერს ლაშა ბუღაძე სოციალურ ქსელში.
