ივანიშვილს ჰგონია, რომ არჩევნებში დამარცხებით მისთვის მთავრდება ყველაფერი რაც მნიშვნელოვანია, ამიტომაც განსაკუთრებით სახიფათოა ქვეყნისთვის – თინათინ ხიდაშელი

პარლამენტის თავმჯდომარის ბრიფინგს და მის მიერ 2020 წლის 8 მარტის შეთანხმების თაობაზე პოზიციის დაფიქსირებასთან დაკავშირებით, ხელისუფლებასა და ოპოზიციას შორის პოლიტიკური დიალოგის ფასილიტატორებისადმი, გაკეთებულ მიმართვას ეხმიანება თავდაცვის ყოფილი მინისტრი თინათინ ხიდაშელი, 5 პუნქტით განსაზღვრა ის, თუ რისი მოლოდინი შეიძლება ჰქონდეს არჩილ თალაკვაძეს და სერიოზულ საფრთხეს ხედავს ყოველი:

“ბევრის დაწერა შეიძლება პარლამენტის თავმჯდომარის დღევანდელ განცხადებაზე, მაგრამ მხოლოდ რამდენიმე წინადადებით, იმაზე თუ სავარაუდოდ რისი მოლოდინი აქვს:
1. დარწმუნებულია ელჩები არ იტყვიან სახელებით და გვარებით იმაზე მეტს, რაც უკვე თქვეს. (იგულისხმება) აშშ საელჩოს 14 აპრილის განცხადება ოქრუაშვილის საქმეზე. აქ რაც წერია ამაზე მეტი თუ გვითხრეს, მაშინ ფიდელ კასტროს რეჟიმი გაქვთო უნდა მიაყოლონ;
2. და თუ იმაზე მეტი თქვეს, რაც უკვე ნათქვამია და შესაბამისად, ფიდელ კასტროს რეჟიმი გაქვთო, მაშინ რა დარჩება ამ ქვეყნისგან. მსგავსი დარდი როგორც ჩანს არ აქვს Archil Talakvadze-ს;
3. და კიდევ ერთი, იმის მიუხედავად რას იტყვიან, ეს ხომ მათ ცოდნას და მეხსიერებას არ გააქრობს იმაზე, თუ სინამდვილეში რაზე იყო შეთანხმება. და ეხლა თუ ვერ იტყვიან ეს ხომ არ ნიშნავს, რომ ეს პირობა გაქრება და უკვალოდ ჩაივლის;
4. მუდამ ასეთი ნახევარი ნაბიჯებით რატომ დადის ხელისუფლება?! ხვალ ამ მოტივით საკონსტიტუციო ცვლილებებზე თუ იტყვის უარს, მერე ხომ დაემხობათ თავს მთელი ცივილიზებული სამყარო და სინამდვილეში კი მორიგ ჯერზე ეწირება ქვეყნის რეპუტაცია. და შემდეგ სერიაში რა ხდება?
5. ყველაზე საშიში ამ ყველაფერში კი ის არის, რომ სააკაშვილისგან განსხვავებით, რომელმაც ბოლო სერიაში იცოდა, რომ თუკი ყველაფრის მიუხედავად დამარცხდებოდა, თუ ამ დედამიწაზე უნდოდა ცხოვრება, უნდა ეღიარებინა შედეგები, ეს ივანიშვილმა ნამდვილად არ იცის, ვინაიდან დღეს დარწმუნებულია, რომ თუ ძალაუფლებას დაკარგავს ამით ყველაფერი მთავრდება მისთვის.