საარჩევნო სისტემის ცვლილებებთან დაკავშირებით მიღწეული შეთანხმების განმარტებისას “ქართული ოცნების” აღმასრულებელი მდივანი ამტკიცებს, რომ არანაირი შეთანხმება არ მომხდარა კონკრეტული პირების ციხიდან გამოშვების თაობაზე. როგორც ირაკლი კობახიძე აღნიშნავს რამდენჯერმე იყო აღნიშნული საკითხი დაყენებული, თუმცა ყველა შემთხვევაში ხელისუფლების წარმომადგენლების უარი დაფიქსირდა და ამის გათვალისწინებით მოეწერა ხელი შეთანხმებას. მმართველი პარტიის აღმასრულებელი მდივანი მიმართავს ფასილიტატორებს, დააფიქსირონ თავიანთი პოზიცია:
“ჩვენ გვინდა ელჩებს ვთხოვოთ, მათ დააფიქსირონ საკუთარი პოზიცია იმასთან დაკავშირებით, თუ რა იყო შეთანხმების შინაარსი. იყო თუ არა შეთანხმების შინაარსი უკანონო ჩარევა სასამართლოს, პროკურატურისა და პრეზიდენტის უფლებამოსილებაში,” – მიმართავს ფასილიტატორებს ირაკლი კობახიძე.
პარლამენტის ყოფილი თავმჯდომარე ოპოზიციის მოთხოვნების განმარტებისას აცხადებს რომ მათ საკონსტიტუციო ცვლილების ჩაშლა სურთ და ამასთან დაკავშირებით პასუხისმგებლობას მთლიანად ოპოზიციას აკისრებს:
“თუ ოპოზიცია ემუქრება საზოგადოებას, რომ ის ჩაშლის საკონსტიტუციო ცვლილებებს, თუ არ გათავისუფლდება სამი პირი, ეს იქნება, ბუნებრივია, მთლიანად მათი პასუხისმგებლობა, ეს თუ ასე მოხდა. აქედან გამომდინარე, ჩვენ მივიღეთ პრევენციული ზომა იმისთვის, რომ ეს ასე არ მოხდეს.
საზოგადოებას ისინი ემუქრებიან, თუმცა ჩვენ დიდი იმედი გვაქვს, რომ ეს მუქარა ვერ იქნება შედეგის მომტანი. ამასთან დაკავშირებით არის მიმართული ჩვენი თხოვნა ელჩების მიმართ.
თუ პროცესი იქნება ისე წარმართული, როგორც უნდა წარიმართოს, ამ შემთხვევაში, ბუნებრივია, ოპოზიციას ვერ ექნება ვერავითარი რესურსი, რომ მათ შეასრულონ ის მუქარა, რომელიც გამოხატეს საზოგადოების მიმართ,” – განაცხადა ირაკლი კობახიძემ.
