“სამართალი მაშინ იზეიმებს, როცა ირაკლი ღარიბაშვილი – სხვებთან ერთად და სხვა დანაშაულების გამოც – უპირველესად 5 ივლისის ტრაგიკული პოგრომის გამო დაისჯება” – ლაშა ბუღაძე

ქართველი მწერალი, დრამატურგი ლაშა ბუღაძე მთავრობის ყოფილი მეთაურის, ირაკლი ღარიბაშვილის დაპატიმრების ფაქტს კონკრეტული განმარტებებით ეხმაურება:

“საბჭოთა-მაფიოზური ტრადიცია: ყოფილი ბობოლების დასჯა, რომელიც არაფერს ცვლის ჩამპალ, ბანდიტურ და იერარქიულ სისტემაში.

სამართალი მაშინ იზეიმებს, როცა ირაკლი ღარიბაშვილი – სხვებთან ერთად და სხვა დანაშაულების გამოც – უპირველესად 5 ივლისის ტრაგიკული პოგრომის გამო დაისჯება. იმ დღის დილას რომ “დალოცა” პოგრომისთვის მათივე წაქეზებულ-დაფინანსებული დუგინისტები. მასზე და ივანიშვილზეა იმ დღის ცოდვა, ლექსო ლაშქარავას სიკვდილი და მთელი ქვეყნის წინააღმდეგ მოწყობილი ტერორი.

5 ივლისია ის მთავარი, რის გამოც ეს უსახელო კაცი (“რაც გინდათ, ის დაუძახეთ“) შავ ლაქად შერჩება ავტორიტარიზმის ამ უმძიმეს წლებს.

არავის დაგვავიწყდება არც ის “სასულიერო პირები”, კურთხევა რომ გასცეს იმ დღეს რუსულ პოგრომზე და არც ის დაქირავებული თუ დაუქირავებელი ბრბო, “ოჯახის სიწმინდის დღეს” რომ შესწირეს ცოცხალი ადამიანი“, – წერს ლაშა ბუღაძე სოციალურ ქსელში.