ევროკავშირის მიერ, საგრანტო პროგრამების მხრივ, საქართველოში არასამთავრობო სექტორისთვის თანხის გამოყოფას პოლიტიკური შეფასებებით ეხმაურება “ქართული ოცნების” ერთ-ერთი ლიდერი, გიორგი ვოლსკი:
“პროგრამების დაფინანსების არანაირი წინააღმდეგობა არ გვაქვს, პირიქით მივესალმებით ყველანაირ დახმარებას, მათ შორის, რომელიც არასამთავრობო ორგანიზაციების პროგრამებით ხორციელდება.
600-მდე თუ უფრო მეტი არასამთავრობო ორგანიზაცია დარეგისტრირდა ამ გამჭვირვალობის კანონის მიხედვით და ფარას კანონის მიხედვით, ყველამ, მათ შორის, მათ, ვინც თავისი ანგარიშები და რეგისტრაცია საზღვარგარეთ გადაიტანეს, ანგარიში უნდა ჩააბაროს ქვეყანას და საზოგადოებას.
ამ პრინციპზე ვდგავართ და რასაკვირველია, აქედან უკან არ დავიხევთ, მიუხედავად მარტა კოსის თუ საქართველოს მოძულე სხვა ადამიანთა კრიტიკისა.
საზოგადოებამ უნდა იცოდეს, რა თანხა შემოდის და რაში იხარჯება, წინააღმდეგ შემთხვევაში, ეს არის შავი ფული.
ნურავინ ეცდება, რომ შემოიტანოს თანხა და ჩადოს იმ ექსტრემიზმის განვითარებაში, რომელიც, სამწუხაროდ, ვიხილეთ თბილისის ქუჩებში და არც ახლა არის გამორიცხული, რომ სწორედ ამ მიზნით ხდებოდეს ამ თანხების კოორდინაცია“, – განაცხადა გიორგი ვოლსკიმ.
