კრიზისიდან თავის დაღწევის ფორმულა აღმშენებლობის იდეის გარშემო გაერთიანებაშია – გიორგი ვაშაძე

8 ოქტომბერს კამპანია, სტრატეგია “აღმაშენებლის” ფარგლებში პირველი თემატური პრეზენტაცია გაიმართა. იდეის ავტორმა და “ახალი საქართველოს” ლიდერმა გიორგი ვაშაძემ “ივენთ ჰოლში” შეკრებილ საზოგადოებას წარუდგინა გეგმა, თუ როგორ შევქმნათ სამუშაო ადგილები და გავზარდოთ თითოეული ოჯახის შემოსავალი წარმოების განვითარების გზით. ქვეყნის ინდუსტრიული განვითარების თემატურ პრეზენტაციაზე, როგორც დაინტერესებული მოქალაქეები, ასევე დარგის სპეციალისტებიც იმყოფებოდნენ, რომლებმაც აღნიშნული გეგმა დადებითად შეაფასეს. როგორც სტრატეგია “აღმაშენებლის” იდეის ავტორები აცხადებენ, აღნიშნული გეგმა ქართულ რეალობაზეა მორგებული და სახელმწიფოს სწრაფ განვითარებას შეუწყობს ხელს. მათი განცხადებით – გეგმები და იდეები, რომელიც საქართველოსთვის ინდივიდუალურად შეიქმნა ქვეყანას კრიზისიდან თავის დაღწევაში დაეხმარება.

“სამწუხაროდ ვდგავართ იმ რეალობის წინაშე, სადაც ქვეყანაში მოსახლეობის უმრავლესობას არ აქვს სამუშაო ადგილები. სტრატეგია “აღმაშენებელი”. ეს არის ფორმულა, თუ როგორ დავამარცხოთ ის პრობლემები რომელიც დღეს ჩვენ გვაქვს. დავამარცხოთ ის გასაჭირი რაც დღეს ქვეყანაშია. ჩვენი მთავარი მიზანია აღმშენებლობის იდეის მიხედვით შევქმნათ ის კონკრეტული მიმართულებები და გეგმები, რაც ქვეყანაში განსავითარებელია. ყველას მინდა ვუთხრა, რომ არსებობს კრიზისიდან თავის დაღწევის ფორმულა, ამისათვის კი საჭიროა, რომ აღმშენებლობის იდეის გარშემო გავერთიანდეთ”, – განაცხადა გიორგი ვაშაძემ.

შეგახსენებთ, რომ სტრატეგია “აღმაშენებლის” გუნდი საზოგადოებას ქვეყნის განვითარების თემატურ გეგმებს ყოველკვირეულად წარუდგენს და როგორც ამ ახალი იდეის ავტორები აცხადებენ საქართველოს პროგრესული წინსვლის პროექტი 20 ყველაზე განვითარებული ქვეყნის მაგალითზე შეიქმნა და მასზე სტრატეგიის გუნდთან ერთად 50-მდე ქართველი და უცხოელი ექსპერტი მუშაობდა.

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *