კიდევ ერთი აფეთქება დედაქალაქში, რაც ბუნებრივი აირის გაჟონვას მოჰყვა. აფეთქებას მსხვერპლი არ მოჰყოლია, თუმცა 8 ადამიანი დაშავდა, რომლებიც გადანაწილებულნი არიან დამწვრობისა და ქირურგიის ცენტრში, ასევე ღუდუშაურისა და იაშვილის კლინიკებში.
როგორც ჯანდაცვის მინისტრმა, დავით სერგეენკომ განაცხადა, დაშავებულთაგან უმრავლესობის მდგომარეობა საშუალო სიმძიმისაა და მხოლოდ ორი პაციენტის მდგომარეობაა საყურადღებო, რომლებსაც სასუნთქი გზების დამწვრობა აქვთ.
დედაქალაქის მერის განცხადებით, ასეთი ფაქტების გამომწვევი მიზეზები ძირითადად კუსტარულად დამონტაჟებული გამათბობლებია და მოსახლეობასთან კომუნიკაციის ნაკლებობა.
“პრობლემა არის იმაში, რომ ჩვენ არაერთხელ გავაკეთეთ განცხადება, თუმცა უფრო მეტი კომუნიკაციაა საჭირო, იმასთან დაკავშირებით, რომ გაზგამათბობლები, რომლებიც კუსტარულად არის დაყენებული, სერიოზულ პრობლემას წარმოადგენს.
უფრო მეტი კომუნიკაციაა საჭირო. უფრო მეტი ახსნა-განმარტებაა საჭირო მოსახლეობისთვის” – განაცხადა კახა კალაძემ.
თვითმხილველების განცხადებით დილიდან იგრძნობოდა ბუნებრივი აირის მძაფრი სუნი და აღნიშნულის თაობაზე შეატყობინეს “ყაზტრანსგაზს”.
მომხდარ ფაქტთან დაკავშირებით განცხადებას ავრცელებს “ყაზტრანსგაზი”:
“დიღმის მასივში, მე-4 კვარტალის მე-5 კორპუსში ბუნებრივი გაზის დაგროვების და მომხდარი აალების მიზეზი, სავარაუდოდ, ექსპლუატაციის წესების უხეში დარღვევა გახდა.
ბინა, რომელშიც აალება მოხდა ქირავდებოდა და ამ დროისთვის დაკეტილი იყო. წინასწარი ინფორმაციით, დამქირავებლებმა საცხოვრებელი ფართი გუშინ დატოვეს.
“ყატრანსგაზ-თბილისი” კიდევ ერთხელ მოგიწოდებთ, არ დატოვოთ გაზდანადგარები უყურადღებოდ.
გაუფრთხილდით თქვენი და მეზობლების სიცოცხლეს!”
როგორც სამართალდამცავი ორგანოების წარმომადგენლები იტყობინებიან – აღნიშნულ ფაქტთან დაკავშირებით გამოძიება საქართველოს სსკ-ის 2401 მუხლით, ელექტრო ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევის კვალიფიკაციით დაიყო.