საქართველოს სტრატეგიული ანალიზის ცენტრის (GSAC) დამფუძნებელი, ნოდარ ხარშილაძე ძალზე მწვავე შეფასებას აძლევს ქვეყანაში მიმდინარე პროცესებს და ფეისბუკის საკუთარ გვერდზე აფიქსირებს საკმაოდ კრიტიკულ პოზიციას ხელისუფლების საქმიანობასთან მიმართებაში:
“არაკომპეტენტურობა და კორუფცია, ან ორივე ერთად. ეს არის ჩვენი ხელისუფლების უმეტესობის მთავარი პრობლემა. შედეგად ღრმავდება სახელმწიფო ინსტიტუტების მოშლის პროცესი, რაც არამარტო ტერმინია არამედ ყოველდღიურ და მარტივ სიმპტომებში ითარგმნება.
პატრული მუშაობს უარესად, კრიმინალი იმატებს, იუსტიციის სახლში რიგები გაჩნდა, საყოფაცხოვრებო ტრაგედიები მომრავლდა, ეს ყველაფერი სიმპტომებია ვირუსის, რომელიც სახელმწიფოს ჭირს, არაკომპეტენტურობა და კორუფცია, ან ორივე ერთად. როგორც შიდსის ვირუსი, რომელიც სახელმწიფოს იმუნურ სისტემას ანადგურებას, შედეგად ყველა პოტენციური პრობლემა რეალურად ხდება, ყველა გართულება რთულდება, ცხოვრება უბრალოდ უარესი ხდება, არაკომპეტენტურობა და კორუფცია, ან ორივე ერთად.
და თავისით ამას არაფერი ეშველება. უსასრულო ჭაობია, როგორც წყვიადი განთიადის გარეშე, ან როგორც გვირაბი, რომლის ბოლოს შუქი არ ჩანს, იმიტომ რომ ვიღაც არაკომპეტენტურს ნათურის დაყენება დაავიწყდა, ან კიდე ვიღაც კორუმპირებულმა მოიპარა, ან ორივე ერთად.”