ეროვნული ნაკრებისა და საფრანგეთის “პსჟ”-ს ფეხბურთელი, ხვიჩა კვარაცხელია, საქართველოს ფეხბურთის ფედერაციის დაჯილდოებაზე, 2025 წლის საუკეთესო ფეხბურთელად დასახელდა. აღნიშნულთან დაკავშირებით, ემოციური იყო კვარაცხელიას პირველი კომენტარი:
“პირველ რიგში მინდა მადლობით დავიწყო – მადლობა თითოეულ იმ ადამიანს, ვინც დააფასა ჩემი შრომა და დღეს მაქვს შესაძლებლობა მივიღო ეს ჯილდო. 2025 წელი, კარიერული თვალსაზრისით, ყველაზე წარმატებული წელი იყო, რითიც ძალიან ვამაყობ.
ძალიან მიხარია, რომ შევძელი ქართველი გულშემატკივრების გახარება.
რაც შეეხება ნაკრებს, სამწუხაროდ, ჩვენ ვერ შევძელით იმ მიზნის მიღწევა, რომელიც გვსურდა, მაგრამ თითოეული ფეხბურთელი გრძნობს პასუხისმგებლობას და 2026 წელს ჩვენ უფრო ძლიერები დავბრუნდებით, შევეცდებით შევასრულოთ ის მიზანი, რაც გვაქვს.
მინდა წინასწარ მოგილოცოთ დამდეგი შობა-ახალი წელი, დაესწარით მრავალს, ყოველივე საუკეთესოს გისურვებთ!” – განაცხადა ხვიჩა კვარაცხელიამ.
ინფორმაციისთვის: ხვიჩა კვარაცხელია საქართველოს წლის საუკეთესო ფეხბურთელად უკვე მეხუთედ დაასახელეს – (2020, 2021, 2022, 2023, 2025 წლებში, რაც რეკორდია.
ასევე აღსანიშნავია, რომ ხვიჩამ, ამ სეზონში, “პსჟ”-სთან ერთად, მოიგო საფრანგეთის ჩემპიონატი, საფრანგეთის თასი, საფრანგეთის სუპერთასი, უეფა-ს ჩემპიონთა ლიგა, უეფა-ს სუპერთასი და ფიფა-ს საკონტინენტთაშორისო თასი.
