სტატეგია „აღმაშენებლის“ გუნდის წევრმა და ექსპერტმა დავით ცეკვავამ ეპიდ. უსაფრთხოების ფონზე, საქართველოში ფინანსური სტაბილურობის შენარჩუნებისათვის გადასადგმელ აუცილებელ ნაბიჯებზე ისაუბრა. ექსპერტის განმარტებით და პრეზენტაციაზე წარდგენილი ანტიკრიზისული გეგმის მეორე ნაწილის მიხედვით, აუცილებელია ქვეყანამ მოიზიდოს მინიმუმ 2 მილიონი ტურისტი, რადგან ტურისტების შემოსვლას თან ახლავს უცხოური ვალუტის შემოდინება ქვეყანაში:
„იმისათვის რომ საქართველოში შიმშილის დაძლევა მოხდეს და ხალხი არ მივიყვანოთ შიმშილის ზღვარზე, მნიშვნელოვანია შევინარჩუნოთ ქვეყნის ფინანსური თუ ეკონომიკური სტაბილურობა.
როგორც ხელისუფლებამ განაცხადა, – საზღვრებს გავხსნით მესამე კვარტალში და ტურისტების მიღებას დავიწყებთ ზამთრის სეზონზე – ეს იქნება ქვეყნისთვის დამღუპველი გადაწყვეტილება.
ზამთრის დადგომასთან ერთად გაიზრდება იმპორტზე მოთხოვნა, გარდა ამისა ჩვენი ხელისუფლება გვეუბნება, რომ მსხვილი ინფრასტრუქტურული პროექტები გაგრძელდება და წლის ბოლოსთვის უცხოური ვალუტის დიდი ნაკადის გადინება მოხდება ქვეყნიდან. ერთადერთი ძირითადი შემოსავალი, ერთადერთი ძირითადი სავალუტო ნაკადების ინექცია ეკონომიკაში გვრჩება ტურისტული ბიზნესი.
ძალიან მაღალი მოლოდინით და ალბათობით, იქნება მაღალმხარჯველი ტურისტების შემოდინება. მეტი თვალსაჩინოებისათვის, თუ აქამდე საშუალო ფისკალური ეფექტი ერთი ტურისტისგან იყო 300 აშშ დოლარის ფარგლებში, ახლა მოლოდინია, რომ საშუალოდ ერთი ტურისტი დაახლოებით 700 აშშ დოლარს დახარჯავს და მეტი ვადით დარჩება ქვეყანაში.
მინიმუმ 2 მილიონი ტურისტის მოზიდვა უკვე ზაფხულის სეზონზე უნდა მოხდეს და არა წლის ბოლოს, როგორც ამბობს ხელისუფლება, იმისათვის რომ ამ ტურისტებს მოჰყვეს ფინანსური ნაკადების ზრდა ანუ სავალუტო ნაკადების ზრდა. აუცილებელია ქვეყანაში შევინარჩუნოთ საგადამხდელო ბალანსი და ფინანსური წონასწორობა.
საქართველოსთვის ძალიან მნიშვნელოვანი და მთავარია სტრატეგია „აღმაშენებლის“ მიერ მომზადებული გეგმის მაქსიმალურად გათვალისწინება. ჩვენ ამ პრეზენტაციით ვცდილობთ შევინარჩუნოთ საგადამხდელო ბალანსი და ფინანსური წონასწორობა, მივაწვდინოთ ხმა ხელისუფლებამდე,’’ – აცხადებს დავით ცეკვავა.
ავტორი
თამთა ასლანიშვილი
