“მთავარი არხის”, “ტვ-პირველისა” და “ფორმულას” ერთობლივი განცხადების შესახებ საუბრისას თამარ კორძაიამ მწვავე შეფასებები გააკეთა კომუნიკაციების ეროვნული კომისიის მიმართ და მას მთავარი ცენზორი უწოდა:
“კომუნიკაციების ეროვნული კომისია გახდა ნომერ პირველი ცენზორი ამ ქვეყანაში, იმიტომ რომ პირველი გადაწყვეტილება, რის გამოც კომისიამ ეს ტელევიზიები დაასანქცირა, იყო სიძულვილის შემცველი კლიპის ეთერში გაშვება, რომელიც სამოქალაქო საზოგადოების წარმომადგენლებს ესხმის თავს. ამ ეტაპზე უკვე ეს ბანერები უნდა განათავსონ სატელევიზიო რეკლამის სახით, რაზეც ტელევიზიებმა წინასწარ გაუგზავნეს კითხვა კომუნიკაციების ეროვნულ კომისიას, ჩაესვათ თუ არა და კომისია ავალებს, რომ ჩასვან ეს რეკლამა. კომისია არის გამოხატვის თავისუფლების ჯალათი ამ ქვეყანაში და არა დამცველი“, – თქვა თამარ კორძაიამ.
შეგახსენებთ, “ქართული ოცნების” მიერ უკრაინელი ხალხის ტრაგედიით სპეკულირებასთან დაკავშირებით “მთავარმა არხმა”, “ტვ-პირველმა” და “ფორმულამ” ერთობლივი განცხადება გაავრცელეს, სადაც აღნიშნულია, რომ ისინი არ აპირებენ ხელი შეუწყონ “ქართული ოცნების” რუსულ პროპაგანდას და უკრაინელი ხალხის დაცინვას და, აქედან გამომდინარე, უარს ამბობენ ამორალური ბანერების ეთერში გაშვებაზე, რომლებიც “ქართულ ოცნებას” ქუჩებში, ბილბორდებზე აქვს გამოფენილი.
ინფორმაციას “ერთიანობა – ნაციონალური მოძრაობის” პრესსამსახური ავრცელებს
