,,ლეიბორისტული” პარტიის თავმჯდომარემ, შალვა ნათელაშვილმა Facebook live-ის მეშვეობით პოლიტიკური შეფასება გააკეთა პარტია ,,ქართული ოცნების” დამფუძნებლისა და საპატიო თავმჯდომარის, ბიძინა ივანიშვილის გორში გამართული შეხვედრის დროს გაკეთებულ განცხადებასთან დაკავშირებით:
,,მე ვერ ვუყურე გორში მმართველი პარტიის და მისი ე.წ. ლიდერ-ოლიგარქის თავყრილობას. რუსულ საიტებზე შევედი და წავაწყდი სიხარულის ყიჟინას იმის თაობაზე, რომ არჩევნების შემდეგ საქართველო ბოდიშს მოუხდის ოკუპანტ-სეპარატისტებს ცხინვალის რეგიონში მომხდარის გამო.
მინდა მოგახსენოთ, რომ აი, ამ განცხადებით, რაც ქვეყნის ფაქტობრივმა მმართველმა გააკეთა, შესრულდა არა მარტო კრემლის დავალება – ზუსტი შესაბამისობით, არამედ დღევანდელ ეტაპზე გამოირიცხა იმაზე ფიქრის პერსპექტივაც, რომ ეს სივრცე დედა-სამშობლოს დაუბრუნდეს და უფრი მეტიც, მომზადდა პოლიტიკურ-სამართლებრივი ნიადაგი, რათა ჩვენმა მტრებმა აღასრულონ თავიანთი სანუკვარი ოცნება – ცხინვალის რეგიონი მიუერთონ რუსეთის ფედერაციას და შექმნან რესპუბლიკა ალანია კავკასიონის ჩრდილოეთ და სამხრეთ ფერდობებზე.
ეს ჩაიდინა დღეს ოლიგარქმა ივანიშვილმა. მისი დანაშაულებრივი-მოღალატეობრივი ქმედებების ანულირება კიდევ შესაძლებელია 26 ოქტომბერს ქართველი ხალხის მიერ გამოტანილი ისტორიული ვერდიქტით…”, – განაცხადა შალვა ნათელაშვილმა.
ავტორი
ნინი ხიჯაკაძე
