„ახალი საქართველოს“ თავმჯდომარე გიორგი ვაშაძე უნივერსალური სამედიცინო ცენტრის (ყოფილი ონკოლოგიის ნაციონალური ცენტრი) პერსონალის პრობლემებს ადგილზე გაეცნო. გაირკვა, რომ ექიმებს უმძიმეს მდგომარეობაში უწევთ სამსახურეობრივი მოვალეობის შესრულება, ხელფასებისა და სამედიცინო ინვენტარის გარეშე. მედიკოსები აღნიშნავენ, რომ ამ მძიმე ვითარების გამო დაიხურა მორფოლოგიისა და ციტოლოგიის კაბინეტები, რამაც გამოიწვია სამედიცინო პერსონალის გადინება. კლინიკის თანამშრომლები სხვა განყოფილებების დახურვასაც არ გამორიცხავენ.
„ეს ადგილი, სადაც ახლა ვიმყოფებით უნდა იყოს ფუნდამენტი ონკოლოგიური დაავადებების დამარცხების, მათი მკურნალობის. არ არის ადამიანური, როცა იღებ პასუხისმგებლობას და ექიმებს და ინფრასტრუქტურას ასეთ პირობებში ამყოფებ. ამ დროს მარტო ექიმები კი არ ზარალდებიან – ავადმყოფები, პაციენტები ზარალდებიან და ვერ ვშველით იმ ადამიანს, რომელსაც შეიძლება ვუშველოთ. ამიტომ ძალიან მნიშვნელოვანია ამ საკითხის გადაწყვეტა.
შევთანხმდით კონკრეტულ სამოქმედო გეგმაზე, ექიმებთან და ადმინისტრაციის წარმომადგენლებთან ერთად. ჩვენ მიგვაჩნია, რომ პოლიტიკა გვერდით უნდა გადავდოთ და საკითხი მოგვარდეს.
ქალბატონ ტიკარაძეს მოვუწოდებ, რომ მზად ვართ ნებისმიერ წამს შეხვედრისათვის, რომ ეს საქმე გადაიჭრას. ეს არის მისი პასუხისმგებლობა და ვერ დაიძვრენს თავს ამ პასუხისმგებლობისაგან, ამის გარანტიას ვაძლევ,“ – განაცხადა გიორგი ვაშაძემ
გაერთიანებული ოპოზიციის ლიდერმა პერსონალს წარუდგინა კონკრეტული სამოქმედო გეგმა, განაცხადა კონკრეტული თარიღის შესახებ, როდესაც უკვე იურისტებთან ერთად იმსჯელებენ და ოფიციალური განცხადებით მიმართავენ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს, რომ საკითხი რაც შეიძლება მოკლე ვადებში დადებითად იქნას გადაწყვეტილი.
„ოთხშაბათს არის შემდეგი შეხვედრა ჩანიშნული, სადაც უკვე იურისტებთან ერთად შევხვდებით და ოფიციალურ მოთხოვნას წავუყენებთ ჯანდაცვის სამინისტროს. არ მოვეშვებით ამ საკითხს მანამ, სანამ უწყება ყველაფერს არ მოაგვარებს.
ექიმების ბედის ანაბარა დატოვება არის არაადამიანური, არასწორი ქმედება. ბევრმა გაუგებრობამ და ათასნაირმა ინტერესებმა, რომელიც ამ ტერიტორიისა და საავადმყოფოს მიმართ ტრიალებს ძალიან დიდი პრობლემა შექმნა და კრიზისში ჩააგდო ფაქტობრივად თანამშრომლებიც და ონკოლოგიის ნაციონალური ცენტრიც,“- აღნიშნა ოპოზიციონერმა ლიდერმა.
ავტორი
თამთა ასლანიშვილი
