ახალი წლის დღეებში, იაპონიის ცენტრალურ ნაწილში მიწისძვრა დაფიქსირდა. ბიძგების სიმძლავრე 7,6 მაგნიტუდას აღწევდა. ეპიცენტრი ნოტო-ს ნახევარკუნძულისა და იშიკავას პრეფექტურაში დაფიქსირდა.
ბოლო ცნობით, იაპონიაში მიწისძვრის შედეგად დაღუპულთა რიცხვმა 60 ადამიანს გადააჭარბა, თუმცა, როგორც ვარაუდობენ, მაჩვენებელი შესაძლოა გაიზარდოს.
ფაქტთან დაკავშირებით საგანგებო ბრიფინგზე განცხადება გააკეთა იაპონიის პრემიერ-მინისტრმა, ფუმიო კისიდამ:
,,მიწისძვრიდან 40 საათზე მეტი გავიდა. მაშველები ყველაფერს აკეთებენ, რომ რაც შეიძლება დროულად მოხდეს ნანგრევებში მოყოლილთა გადარჩენა. ყოველი წუთი მნიშვნელოვანია. სტიქიის რეგიონში ამინდის გაუარესებას და განმეორებით ბიძგებს ველოდებით. მოსახლეობას ყურადღებით ყოფნისაკენ მოვუწოდებთ. იმ შემთხვევაში, თუ მეწყერის ნიშნებს შეამჩნევენ, უსაფრთხო ტერიტორიაზე გადანაცვლებას ვურჩევთ“, – განაცხადა ფუმიო კისიდამ.
როგორც იაპონიის პრემიერ-მინისტრი, ფუმიო კისიდა განმარტავს აქტიურად მიმდინარეობს ტოკიოს აეროპორტში მომხდარი თვითმფრინავის აფეთქების ფაქტის გამოძიება.
ინფორმაციისთვის: სტიქიის ზონის მიმართულებით ჰუმანიტარული ტვირთით დატვირთული სანაპირო დაცვის თვითმფრინავი სამგზავრო ლაინერს შეეჯახა და აფეთქება გამოიწვია.
პრემიერ-მინისტრის განმარტებით, აღნიშნული ინციდენტი ზეგავლენას არ მოახდენს ჰუმანიტარული დახმარების მიწოდებაზე სტიქიის ზონაში:
,,რაც შეეხება აეროპორტში მომხდარ ინციდენტს – ადგილზე სხვადასხვა უწყება მუშაობს. გამოძიების პარალელურად ყველაფერი კეთდება, რომ საჰაერო სადგურის მუშაობა უზრუნველყოფილი იყოს. გარწმუნებთ, რომ აეროპორტში მომხდარი ინციდენტი, ჰუმანიტარული დახმარების მიწოდებაზე გავლენას არ მოახდენს“, – განაცხადა ფუმიო კისიდამ.
ავტორი
ნინი ხიჯაკაძე
