“ქართული ოცნების” თავმჯდომარე, ირაკლი კობახიძე პარტიის ოფისში გამართულ საგანგებო ბრიფინგზე პოლიტიკურ შეფასებებს და კონკრეტულ განმარტებებს აკეთებს ყოფილ მთავარ პროკურორ, ოთარ ფარცხალაძესთან დაკავშირებით და აღნიშნავს, რომ ამერიკის მხარემ მის სანქცირებასთან დაკავშირებით კონკრეტული მტკიცებულებები უნდა გამოაქვეყნოს:
“ვხედავთ, რომ ამ შემთხვევაშიც მტკიცებულებები არ არსებობს. შესაბამისად, ბუნებრივია, ჩვენთვის რთულია ამ თემასთან დაკავშირებით რეაგირება. როდესაც ასეთი ინფორმაცია ვრცელდება, ასეთი მძიმე ბრალდებები ჟღერდება, საუბარია “ეფ-ეს-ბე-ს” აგენტობაზე, საუბარია იმაზე, რომ ეს ადამიანი ქართულ საზოგადოებაზე ახდენს ჭარბ გავლენას… როდესაც ასეთი ბრალდებები ჟღერდება, ამას წესით უნდა მოჰყვეს ხოლმე მტკიცებულებები. თქვენ გახსოვთ, მოსამართლეების სავიზო შეზღუდვების დაწესების დროსაც არავითარი მტკიცებულება არ გამოქვეყნებულა, აქაც იგივე შემთხვევასთან გვაქვს საქმე, რაც, რა თქმა უნდა, ჩვენ ზოგადად გვირთულებს რეაგირებას. ასეთ დროს საჭიროა მტკიცებულებების გამოქვეყნება და ეს იქნებოდა სწორი დამოკიდებულება ჩვენს სახელმწიფოსა და ქართულ საზოგადოებასთან მიმართებაში“, – აღნიშნავს ირაკლი კობახიძე.
მმართველი პარტიის ლიდერი, ასევე, ეხმაურება ეროვნული ბანკის გადაწყვეტილებას ოთარ ფარცხალაძის ანგარიშების გაყინვასთან დაკავშირებით:
“როდესაც საქმე ეხება გარკვეული გადაწყვეტილების მიღებას და არ ვიცი ეროვნული ბანკის რომელი შიდა რეგულაცია შეიძლება არსებობდეს, მაგრამ უპირატესობა ყოველთვის ენიჭება საქართველოს კონსტიტუციას. ასეთი გადაწყვეტილება თუ არის მიღებული ეროვნული ბანკის მხრიდან, პირდაპირ ეწინააღმდეგება საქართველოს კონსტიტუციას, კერძოდ, მის ერთ-ერთ ფუძემდებლურ პრინციპს, – ეს არის უდანაშაულობის პრეზუმფცია, როდესაც ლაპარაკია საქართველოს მოქალაქეზე. საქართველოს მოქალაქე განსაკუთრებულად არის დაცული საქართველოს კონსტიტუციით, ადამიანის ძირითადი უფლებები, მათ შორის, უდანაშაულობის პრეზუმპციით. რა თქმა უნდა, უცხოელს შეიძლება შეუზღუდო აქ კომერციული საქმიანობის ან სხვა ტიპის საქმიანობის წარმოება, მაგრამ როცა საქართველოს მოქალაქეს ეხება საქმე, იქ სახელმწიფო მოქმედებს განსხვავებული პასუხისმგებლობით“, – აცხადებს ირაკლი კობახიძე.
