“თუ ჩვენ შეშფოთებას რეალური საფუძველი გაუჩნდება – არ დავაყოვნებთ” – დიმიტრი მედვედევი საქართველოსთან მიმართებაში

2008 წლის აგვისტოს ომთან დაკავშირებით, რუსეთის მაშინდელმა პრეზიდენტმა, ამჟამად უშიშროების საბჭოს თავმჯდომარის მოადგილემ, დიმიტრი მედვედევმა ინტერვიუ მისცა რუსულ გამოცემა “არგუმენტი ი ფაქტი”-ს, სადაც მძიმე შეფასებები გააკეთა და გამაფრთხილებელი მინიშნებებიც:

“2008 წლის აგვისტოში, ცხინვალის ბარბაროსული დაცხრილვისა და მშვიდობიან მოსახლეობაში მრავალრიცხოვანი მსხვერპლის გამო, მე, როგორც რუსეთის პრეზიდენტმა, მივიღე საპასუხო საბრძოლო ქმედებების გადაწყვეტილება, საქართველოს სამხედრო თავდასხმის ჩახშობისა და მშვიდობისთვის იძულების. ჩვენ ვმოქმედებდით გაეროს წესდების სრულ შესაბამისობაში. სამხრეთ ოსეთის ტერიტორიაზე შეყვანილი იყო რუსეთის ჯარი. სააკაშვილის ოდიოზურმა რეჟიმმა მიიღო ხისტი საკადრისი პასუხი. დასავლეთში დაუყოვნებლივ აზვირთდა ისტერიის ტალღა, თუმცა ვერაფრის შეცვლა ვერ შეძლო.

დარწმუნებული ვარ 15 წლის წინ ომი არ იქნებოდა, რომ არა უპასუხისმგებლო დანაშაულებრივი ქმედებები სააკაშვილისა და მათი, ვინც ეხმარებოდა.

მას შემდეგ, როცა რუსეთმა ოფიციალურად აღიარა სამხრეთ ოსეთისა და აფხაზეთის დამოუკიდებლობა, ამ რესპუბლიკებმა, ჩვენი ქვეყნის მხრიდან მიცემული უსაფრთხოების გარანტიების პირობებში, დაიწყეს განვითარება, როგორც საერთაშორისო სამართლის სუბიექტებმა და რეგიონში მშვიდობამ დაისადგურა, თანდათან დასტაბილურდა სიტუაცია საქართველოშიც.

დასავლეთმა უნდა გაითავისოს ერთი მთავარი და აუცილებელი გაკვეთილი. 2008 წელს ჩვენ შევაჩერეთ თბილისზე შეტევა, როცა მოხდა საფრთხის აღმოფხვრა და უსაფრთხოების გარანტიების მიღწევა. მაგრამ ახლა მდგომარეობას ისევ აქტიურად ძაბავენ, რომ ჩვენი საზღვრების სიახლოვეს, უკრაინის ფრონტის დამატებით, შექმნან დაძაბულობის კერა. ისევ მიდის საუბრები NATO-ში საქართველოს შესაძლო მიღებაზე. ასევე, თითქოს დაკვეთით, იქ დაიწყო რუსოფობიის აფეთქებები.

ჩვენ არ გვინდა 2008 წლის ისტორიის განმეორება. ჩვენ უწინდებურად მზად ვართ პრობლემების გადასაწყვეტად, მოლაპარაკების მაგიდასთან, გაეროს წესდების სულისკვეთებით. მაგრამ, თუ ჩვენ შეშფოთებას რეალური საფუძველი გაუჩნდება – არ დავაყოვნებთ. აფხაზეთსა და სამხრეთ ოსეთში რუსეთთან მიერთების იდეა ისევ პოპულარულია და სავსებით შესაძლებელია რეალიზება, თუ ამისათვის საფუძვლიანი მიზეზები გაჩნდება“, – განაცხადა დიმიტრი მედვედევმა.