,,სტრატეგია აღმაშენებლის“ თავმჯდომარის, გიორგი ვაშაძისა და ,,ერთიანი ნაციონალური მოძრაობის“ თავმჯდომარის, ლევან ხაბეიშვილის ერთობლივი განცხადებით, შეიქმნა ,,გამარჯვების პლატფორმა“:
,,ნაციონალური მოძრაობა” არის ყველაზე დიდი ევროპული პარტია. ჩვენ, ცხადია, მივიღეთ კონკრეტული გადაწყვეტილება, რომ ,,ნაციონალური მოძრაობის”, პროდასავლური პარტიების პლატფორმაზე გაკეთდეს ,,გამარჯვების პლატფორმა”.
კონსულტაციების შემდეგ მივაღწიეთ შეთანხმებას პარტიასთან, რომელიც ასევე, ყველაზე დიდია ყველა კვლევით პროდასავლურ პარტიებს შორის, ვგულისხმობ ,,სტრატეგია აღმაშენებელს”.
შესაბამისად, დღეიდან, ხალხის დაკვეთით, ,,სტრატეგია აღმაშენებელთან” ერთად გვექნება საერთო სტრატეგია რუსული პარტიის, ბიძინა ივანიშვილის დამარცხების“, – განაცხადა ლევან ხაბეიშვილმა.
გაერთიანებასთან დაკავშირებით ისაუბრა გიორგი ვაშაძემაც:
,,სტრატეგია აღმაშენებელი“ ,,ნაციონალურ მოძრაობასთან’’, მიხეილ სააკაშვილის პარტიასთან და ყველა თაობის პატრიოტ, პროფესიონალ ადამიანებთან ერთად ვიწყებთ გამარჯვების, ცვლილებების და ივანიშვილის რუსული რეჟიმისგან გათავისუფლების მოძრაობას!
ვქმნით ,,გამარჯვების პლატფორმას“, რომელსაც წლებია ელოდებიან საქართველოს მოქალაქეები. პლატფორმას, რომლის მთავარი საზრუნავი იქნება საქართველოს მოქალაქე, მისი პრობლემების მოგვარება, NATO-ში და ევროკავშირში საქართველოს გაწევრიანების დაჩქარება, დეოკუპაცია და ტერიტორიული მთლიანობის აღდგენა!“, – განაცხადა გიორგი ვაშაძემ.
ახალი პტლატფორმა, როგორც განაცხადეს ლიდერებმა, იწყებს ერთის მხრივ მოსახლეობასთან შეხვედრებს, მეორეს მხრივ სამუშაო ჯგუფების შექმნას და პროცესის მაქსიმალურად გააქტიურებას.
ავტორი
ნინი ხიჯაკაძე
