„ფასების სტაბილურობა ეროვნული ბანკის მთავარი მანდატია. ინფლაციას შემცირების ტენდენცია აქვს. მიღწეული შედეგი დადებითია, თუმცა პოზიტიური ტენდენციების მიუხედავად, გაურკვევლობა კვლავაც მაღალია. არის ფაქტორები, რამაც შესაძლოა გამოიწვიოს, როგორც ინფლაციის მატება, ისე დეფლაცია“, – ამის შესახებ პარლამენტის საფინანსო-საბიუჯეტო კომიტეტის თავმჯდომარემ პაატა კვიჟინაძემ პარლამენტის სხდომაზე განაცხადა, სადაც საქართველოს ეროვნული ბანკის 2022 წლის საქმიანობის ანგარიში განიხილეს.
საფინანსო-საბიუჯეტო კომიტეტის თავმჯდომარემ მაღალი ინფლაციის მიზეზად კოვიდპანდემია, რუსეთ-უკრაინის ომი, მიწოდების ჯაჭვის დარღვევა და გლობალური გაურკვევლობა დაასახელა, რაც საქართველოს ეკონომიკაზეც აისახა.
კომიტეტის თავმჯდომარის განცხადებით, ეროვნული ბანკის მიერ განხორციელებული მონეტარული პოლიტიკის შედეგად, ინფლაცია 2022 წელს 9.8%-მდე შემცირდა, ეს ტენდენცია მიმდინარე წელსაც გრძელდება და აპრილის თვის მონაცემებით 2.7%. ინფლაცია 3 %-იან მიზნობრივ მაჩვენებელს ჩამოსცდა.
პაატა კვიჟინაძის თქმით, არსებული გამოწვევების ფონზე მიმდინარე ეკონომიკური პროცესები საჭიროებს დამატებით სიღრმისეულ ანალიზს, შესაბამის დაბალანსებულ მონეტარულ პოლიტიკას და მომავალზე ორიენტირებული გადაწყვეტილებების მიღებას.
საფინანსო-საბიუჯეტო კომიტეტის თავმჯდომარემ ამ კუთხით ლარის კურსთან მიმართებაში ეროვნული ბანკის როლზეც ისაუბრა.
„წლის განმავლობაში ლარის კურსი ძირითად ვალუტებთან მიმართებით მყარდებოდა, ეს ტენდენცია მიმდინარე წელსაც გრძელდება. გაცვლითი კურსის სტაბილურობა მნიშვნელოვანი და სასურველი მიზანია საქართველოს ეკონომიკური სტაბილურობისა და საერთაშორისო ვაჭრობისათვის“, – განაცხადა პაატა კვიჟინაძემ.
მან თავის გამოსვლაში ხაზი გაუსვა ფინანსური სისტემის მდგრადობას, თუმცა აღნიშნა, რომ დოლარიზაცია კვლავაც გამოწვევად რჩება.
„დოლარიზაციის შემცირების კუთხით ბოლო წლებში მნიშვნელოვანი ნაბიჯები გადაიდგა, როგორც პარლამენტის, ისე ეროვნული ბანკის მხრიდან. საჭიროა განხორციელებული ღონისძიებების დეტალური შესწავლა და ანალიზი, რათა დავინახოთ რა შედეგები გვაქვს და რა გამოწვევებია“, – განაცხადა პაატა კვიჟინაძემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
