“ეს არის პირდაპირ ის გზავნილი, რომელსაც პუტინი და კრემლი საქართველოს ხელისუფლების მიმართ უშვებს” – ხატია დეკანოიძე

საქართველოსა და რუსეთს შორის სავიზო მიმოსვლა გაუქმებულია. სპეციალურ განკარგულებას რუსეთის მმართველმა ვლადიმერ პუტინმა ხელი მოაწერა და იგი 15 მაისიდან ამოქმედდება. თემასთან დაკავშირებით და მმართველი პარტიის პოლიტიკასთან მიმართებაში კრიტიკულ შეფასებებს აკეთებს საქართველოს პარლამენტის წევრი, ხატია დეკანოიძე:

,,მე მინდა პირდაპირ ხაზი გავუსვა იმას, რომ პუტინის გადაწყვეტილებები საქართველოს ეხება და ეს არის კატასტროფა. ეს არის ჯილდო საქართველოს ხელისუფლების მიერ გატარებული იმ პოლიტიკის მიმართ, რომელსაც ბოლო თვეების განმავლობაში, განსაკუთრებით 24 თებერვლის შემდეგ, საქართველოს ხელისუფლება, ,,ქართული ოცნება“, ბიძინა ივანიშვილი უკრაინაში რუსეთის ფართომასშტაბიანი აგრესიის შემდეგ ქვეყანაში ატარებს.

ეს არის ანტიდასავლური და ანტიუკრაინული პოლიტიკა. ზუსტად პუტინის გადაწყვეტილება, საქართველოს ხელისუფლება დააჯილდოვოს, სრული ამ სიტყვის მნიშვნელობით, იმას ეხება, რომ მან თავისი გადმოსახედიდან კრემლის გზავნილის გავლენის გასაძლიერებლად – ფრენებზე, ავიამიმოსვლაზე, ასევე სავიზო შეზღუდვაზე აკრძალვა მოხსნა.

ეს არის პირდაპირ ის გზავნილი, რომელსაც პუტინი და კრემლი საქართველოს ხელისუფლების მიმართ უშვებს.

იმ შემთხვევაში, თუ საქართველოს ხელისუფლება ანტიდასავლურ და ანტიუკრაინულ პოლიტიკას გააძლიერებს, მათ შორის, კრემლის გზავნილებსა და გავლენების გაძლიერებას საქართველოში, ეს იქნება და უკვე არის აღქმული ცივილიზაციის წინააღმდეგ წასვლა, განსაკუთრებით, 24 თებერვლის შემდეგ. ეს აღქმულია, როგორც საქართველოს ეროვნული ინტერესების დაკნინება“, – განაცხადა ხატია დეკანოიძემ.

ავტორი
ნინი ხიჯაკაძე