,,სტრატეგია აღმაშენებლის“ თავმჯდომარე გიორგი ვაშაძე პარლამენტში განცხადებას აკეთებს საგამოძიებო კომისიასთან დაკავშირებით და აცხადებს, რომ მნიშვნელოვანია ოპოზიციურმა სპექტრმა არსებული ერთიანობა შეინარჩუნოს, ხოლო საზოგადოებამ პროტესტისთვის მზადება დაიწყოს:
,,3 დღის მანძილზე ოპოზიციის აბსოლუტურმა ერთიანობამ საზოგადოებას კიდევ ერთხელ აჩვენა, რომ ,,ქართული ოცნება“ არის პოლიტიკური ძალა, რომელიც საქართველს ევროინტეგრაციის საბოტაჟს ახორციელებს. ისინი არა უბრალოდ კლანს მფარველობენ, არამედ მათ აღიარებითი ჩვენება მოგვცეს ამ 3 დღის მანძლზე, რომ თვითონ არიან კლანი; თვითონ არიან ადამიანები, რომლებიც სასამართლოში პოლიტიკურად მიკერძოებულ გადაწყვეტილებებს იღებენ; ძარცვავენ ბიზნესს და ინვესტორებს – სწორედ ამ კლანის მეშვეობით. მათთვის საქართველოს ევროპულ პერსპექტივაზე გაცილებით მნიშვნელოვანია, ეს ძარცვის მექანიზმი ქვეყანაში შეინარჩუნონ. ისინი ხელს აფარებენ კლანს.
მათ ეშინიათ ელემენტარულის – რა არის საგამოძიებო კომისია? – ხალხის სამსჯავროზე უნდა მოვიდნენ ადამიანები ვისთან მიმართებაშიც არის კითხვები. საგამოძიებო მოქმედებების მიერ მოპოვებული მტკიცებულებებით, მათ პასუხი უნდა გასცენ ამა თუ იმ ქმედებასთან დაკავშირებით.
სწორედ ოპოზიციის აბსოლუტურმა ერთიანობამ საზოგადოებას აჩვენა, რომ ,,ქართული ოცნება“ პირდაპირ, თავიდან ბოლომდე არის კლანი. რისი ეშინიათ? – ეშინიათ იმის, რომ ჩამოიშლება ეს კლანი. იმიტომ, რომ ბევრი ადამიანი საჯაროდ არ მოაწერს ხელს კლანის წევრობას.
ოპოზიციამ უნდა შევინარჩუნოთ ერთიანობა და მნიშვნელოვანია, გავაგრძელოთ ეს პროცესი. მინდა, საზოგადოებას მივმართო – ,,ქართული ოცნება“ რეალურად უკან იხევს მაშინ, როცა ხედავს ხალხს – ხალხის, საზოგადოების ერთიანობას. ამიტომ აქვე უნდა ვიფიქროთ იმაზე, ხომ არ არის მნიშვნელოვანი, რომ “პროცედურული ომის” პარალელურად, რომელიც პარლამენტში გაგვიმართეს და ფაქტობრივად, პარლამენტი გაუქმებულია, საზოგადოებამ ასევე დაიწყოს მზადება პროტესტისთვის. სწორედ ჩვენი ყველას ერთიანობა არის ერთადერთი გარანტია, რომ წლის ბოლოს ევროკავშირის კანდიდატი ქვეყნის სტატუსი მივიღოთ“, – განაცხადა გიორგი ვაშაძემ.
ავტორი
ნინი ხიჯაკაძე
