პარლამენტის წევრ ხათუნა სამნიძის მიერ კონკრეტულ ოპოზიციონერ დეპუტატებთან მიმართებაში გამოთქმულ პრეტენზიებზე საგამოძიებო კომისიის შექმნის საკითხთან დაკავშირებით, საპასუხო განმარტებებს აკეთებენ ,,ერთიანი ნაციონალური მოძრაობის” თავმჯდომარე ლევან ხაბეიშვილი და პარტიის წევრი ანი წითლიძე:
,,მიუხედავად ჩემი სუბიექტური დამოკიდებულებისა, ნებისმიერ შემთხვევაში, ვაპირებ მხარი დავუჭირო ამ კომისიის შექმნას.
მეორე საკითხი – მე ვიმყოფები ოფიციალური ვიზიტით პოლონეთში, სადაც პრეზიდენტმა სააკაშვილმა უნდა მიიღოს უმნიშვნელოვანესი ჯილდო, რომელსაც მიიღებენ სხვადასხვა ქვეყნის მაღალი თანამდებობის პირები, საზოგადოება ამას ნახავს.
ასევე, ეს ვიზიტი დაგეგმილი იყო პოლონელების მხრიდან 2-3 კვირით ადრე. ამის თაობაზე ცხადია, პარლამენტში არანაზღაურებადი მივლინებაც მაქვს დაწერილი. ჩემს კოლეგებს მარტივად შეეძლოთ ამ ინფორმაციის მოძიება”, – განაცხადა ლევან ხაბეიშვილმა.
თავის მხრივ განმარტებები გააკეთა, ასევე, ანა წითლიძემაც:
,,ჩვენი მივლინების თარიღები იყო დაგეგმილი 10-დან 13 აპრილამდე. ამიტომაც ცოტა გაუგებარი არის ეს ისტერიკა. ასევე მინდა ვთქვა, რომ მიუხედავად იმისა, რომ მე პირდად მხარს ვუჭერ ამ საგამოძიებო კომისიის შექმნას, რიგგარეშე სხდომის თარიღთან დაკავშირებით მე არ ვიყავი ნამდვილად ინფორმირებული.
მე მოვუწოდებ, რომ უფრო ორგანიზებულები იყვნენ და სათითაოდ იქონიონ ყველა დეპუტატთან კომუნიკაცია.
გარდა ამისა ტყუილია, რომ მხოლოდ ჩემი და ლევან ხაბეიშვილის გამო ვერ იქმნება საგამოძიებო კომისია. დამატებით კიდევ 2 დეპუტატი ვერ იქნება თვის ბოლომდე წარმოდგენილი საქართველოს პარლამენტში. შესაბამისად, სულ რომ ხვალ მე და ბატონი ლევან ხაბეიშვილი ვყოფილიყავით პარლამენტში და ხმა მიგვეცა საგამოძიებო კომისიისთვის, იგი მაინც ვერ შეიქმნებოდა”, – განაცხადა ანა წითლიძემ.
ავტორი
ნინი ხიჯაკაძე
