“მონობას თავისი ფასი აქვს და ყველა მონა საკუთარი სისხლით იხდის ამ ფასს” – ზურაბ ბატიაშვილი

უკრაინაში წარმოებული ომი ძვირად უჯდება რუსეთს, განსაკუთრებით ცოცხალი ძალის მხრივ. ამასთან დაკავშირებით, სოციალურ ქსელში გამოქვეყნებულ პოსტში, კონკრეტულ შეფასებებს აკეთებს რონდელის ფონდის მკვლევარი, აღმოსავლეთმცოდნე, ისტორიის მეცნიერებათა დოქტორი ზურაბ ბატიაშვილი:

“ბახმუტთან არსებული სიტუაციის ვიზუალიზაციისთვის – ფრონტის ხაზის მხოლოდ ამ პატარა მონაკვეთზე 33 რუსის გვამია მიმოფანტული.

ტალღა-ტალღა ასკდება საზარბაზნე ხორცი უკრაინულ კედელს და დასავლურ ტექნიკას.

კრემლისთვის ფასი არ აქვს ადამიანის სიცოცხლეს. მისთვის სულ ერთია, რამდენი დაიხოცება და ისინიც ცხვრებივით ემორჩილებიან ბრძანებებს.

ასეთივე სიტუაცია იყო პირველ და მეორე მსოფლიო ომში, როდესაც ასეულ ათასობით ქართველი და სხვა უმცირესობების წარმომადგენლები ეწირებოდნენ იმპერიის სიგიჟეებს. მონობას თავისი ფასი აქვს და ყველა მონა საკუთარი სისხლით იხდის ამ ფასს.

ოღონდ ახლა განსხვავებული სიტუაციაა. ახლა რუსეთს აღარ შეუძლია მილიონობით ჯარისკაცის მობილიზება (ამდენი არც იარაღი აქვს და არც ტანსაცმელი) და მეორე მსოფლიო იმისგან განსხვავებით ვეღარც ამერიკისგან მიიღებს “ლენდ ლიზს”.

რუსეთის იმპერია დამარცხდება და თავის ჯარისკაცებივით დაასრულებს საკუთარ უბადრუკ არსებობას!” – წერს ფეისბუქის პირად გვერდზე ზურაბ ბატიაშვილი.