ავსტრიაში სამუშაო ვიზიტით მყოფმა “სტრატეგია აღმაშენებლის” თავმჯდომარემ პირველი შეხვედრა ავსტრიის პარლამენტის წევრთან, პარტია “ნეოსის” საგარეო მიმართულების და უკრაინის მეგობრობის ჯგუფის ხელმძღვანელთან გამართა. გიორგი ვაშაძისა და ჰელმუტ ბრანდშტატენის შეხვედრის მთავარი საკითხი საქართველოს ენერგოდერეფანს ეხებოდა.
ოპოზიციონერი ლიდერის თქმით, ავსტრიის პარლამენტის წევრის მხრიდან საქართველოს დიდი მხარდაჭერა აქვს და ის აუცილებლად დააყენებს ჩვენი ქვეყნის საკითხს, როგორც საგარეო კომიტეტის წევრი:
“დავიწყეთ შეხვედრები და აქტიური კამპანია ევროპის ყველა წამყვან დედაქალაქში საქართველოს საკითხის პრიორიტეტულობისათვის.
პირველი შეხვედრა გავმართე ავსტრიაში, ჰელმუტ ბრანდშტატენთან, რომელიც ავსტრიის პარლამენტის წევრი, პარტია “ნეოსის” საგარეო მიმართულების და უკრაინის მეგობრობის ჯგუფის ხელმძღვანელია.
შეხვედრაზე ვისაუბრეთ საქართველოს ენერგოდერეფანთან დაკავშირებით და იმაზე, თუ რამდენად მნიშვნელოვანია ეს საკითხი ევროპისთვის.
მივიღეთ სრული მხარდაჭერა და პირობა, რომ საქართველოს საკითხს, ის, როგორც საგარეო კომიტეტის წევრი, აუცილებლად დააყენებს და მისი პარტია, რომელიც ჩვენი პარტნიორია, დაგვეხმარება საქართველოს თემის აქტუალიზებაში,” – აცხადებს გიორგი ვაშაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
