ტერიტორიული მთლიანობის აღდგენის და დეოკუპაციის საკითხებთან დაკავშირებული დროებითი კომისიის სხდომაზე შერიგებისა და სამოქალაქო თანასწორობის საკითხებში საქართველოს სახელმწიფო მინისტრს თეა ახვლედიანს მოუსმინეს.
დახურულ სხდომაზე სახელმწიფო მინისტრმა საქართველოს მთავრობის სამშვიდობო ინიციატივის – „ნაბიჯი უკეთესი მომავლისკენ“ ფარგლებში გამყოფი ხაზის გასწვრივ ვაჭრობის წახალისების მიზნით გაწეული საქმიანობის თაობაზე ისაუბრა. იგივე თემას შეეხებოდა თანამომხსენებლის „მშვიდობის ფონდი უკეთესი მომავლისთვის“ ხელმძღვანელის, ბესიკ ბუგიანიშვილის გამოსვლაც.
„ჩვენ განვიხილეთ საქართველოს ოკუპირებულ რეგიონებში არსებული ვითარება, ის ურთულესი გამოწვევები, რომელიც არის ადგილზე, მათ შორის ჰუმანიტარული და უფლებრივი ვითარება. ასევე ვიმსჯელეთ ჩვენს სამომავლო ხედვებზე და იმ უაღრესად მნიშვნელოვან და აქტუალურ მიმართულებებზე, რომელთა კუთხითაც ვგეგმავთ ჩვენი ერთობლივი საქმიანობის ეფექტიანობის გაზრდას საერთო მიზნის მიღწევის კუთხით“, – განაცხადა სხდომის დასრულების შემდეგ სახელმწიფო მინისტრმა, თეა ახვლედიანმა.
საქართველოს პარლამენტის ტერიტორიული მთლიანობის აღდგენის და დეოკუპაციის საკითხებთან დაკავშირებული დროებითი კომისიის თავმჯდომარის, გიორგი ვოლსკის შეფასებით, სხდომა იყო ძალიან პროდუქტიული და საქმიანი, სადაც საინტერესო წინადადებები მოისმინეს იმასთან დაკავშირებით, როგორ უნდა მუშაობდეს სამშვიდობო ფონდი, თუ სად შეიძლება ქართველებმა, აფხაზებმა, ოსებმა ნახონ საერთო ინტერესი, რა პროექტების განხორციელება შეიძლება იმისათვის, რომ შეიქმნას ისეთი მომავალი, სადაც ომით გახლეჩილი საზოგადოება ერთმანეთს დაელაპარაკება არა ძალის პოზიციიდან, არამედ თანამშრომლობის თვალსაზრისით, თუ როგორ განავითარონ ურთიერთობები.
„რაც არ უნდა მოხდეს, რა პროცესებიც არ უნდა ვითარდებოდეს, ჩვენ უპირველეს ყოვლისა უნდა ვიფიქროთ საზოგადოებების გაერთიანებაზე, რამაც წინაპირობა უნდა შეუქმნას ტერიტორიული მთლიანობის აღდგენას. ჩვენ, პოლიტიკური ძალები საქართველოში, პოლიტიკური გემოვნების მიუხედავად, მონდომებულები და ორიენტირებულები ვართ იმაზე, რომ მშვიდობა იყოს და ერთმანეთს ველაპარაკოთ საქმიანი ენით, ველაპარაკოთ იმაზე თუ როგორ ვაშენოთ სახელმწიფო, როგორ უნდა გადავარჩინოთ ჩვენი შვილებია ამ დაძაბულ ვითარებაში და რა სოციალურ-ეკონომიკური პრობლემები შეიძლება გადავწყვიტოთ ერთად. ამიტომ ეს მესიჯადაც მიიღეთ, რომელიც აუცილებლად ჩავა აფხაზებამდე და ოსებამდე, რომლებიც ცხოვრობენ დღეს ცხინვალის რეგიონში თუ აფხაზეთში. ეს არის რეალობა და ამ რეალობის თაობაზე ვისაუბრეთ დღეს“, – განაცხადა გიორგი ვოლსკიმ.
ინფორმაციას პარლამენტი საზოგადოებასთან ურთიერთობისა და ინფორმაციის დეპარტამენტი ავრცელებს
