,,ერთიანი ნაციონალური მოძრაობის“ პოლიტიკური საბჭოს წევრმა, პარლამენტის დეპუტატმა ლევან ხაბეიშილმა ბრიფინგზე გაკეთებულ განცხადებაში აღნიშნა, რომ ევროპელ კოლეგებს ჩააყენებს საქმის კურსში ოფიციალური წერილით და ასევე მოითხოვს ,,სუს“-ის ხელმძღვანელის, გრიგოლ ლილუაშვილს პარლამენტში თავდაცვის და უშიშროების კომიტეტზე მისვლას:
,,საზოგადოებას კარგად აქვს ინფორმაცია იმის შესახებ, რომ სახელმწიფო უსაფრთხოების სამსახური არაერთ სკანდალშია გახვეული. მათ შორის, მამოების, მეუფეების მოსმენის საქმე, რაზეც მათ განცხადებაც კი არ გაუკეთებიათ, მისი ხელმძღვანელი არც კი შეწუხებულა, როცა მამოების, მეუფეების, პედაგობების ,,კრებსებზე“ იყო საუბარი. ასევე, თუ როგორ იპარავენ წინა საარჩევნოდ ადამიანებს, დეპუტატებს – მაგალითად, დმანისში მომხდარი ფაქტი, როგორ კლავენ დეპუტატებს შანტაჟით, მუქარით, მოსყიდვით და ეს ყველაფერი უკავშირდებოდა სახელმწიფო უსაფრთხოების სამსახურს.
არასდროს, არცერთხელ გრიგოლ ლილუაშვილს, სუს-ის ხელმძღვანელს არანაირი განცხადება ამ მიმართულებით არ გაუკეთებია. რომ უსმენენ მთელ საქართველოს, მამაოებს, მეუფეებს, პედაგოგებს – ფაქტობრივად, მათ საძინებელში წერენ – ამაზე არასდროს არანაირი რეაგირება არ ჰქონია.
გაგიკივირდებათ, მან მე და 2 ტელეკომპანიას უჩივლა სასამართლოში ქოლ-ცენტრების საქმეზე, რომელიც უკავშირდება თაღლითურ ინტერნაციონალურ დანაშაულს, საიდანაც ,,ქართული ოცნება“, ბიძინა ივანიშვილი, ლილუაშვილი და ბიძინა ივანიშვილის დეიდაშვილი წელიწადში დაახლოებით მილიარდ დოლარამდე შავ ფულს გამოიმუშავებდნენ. ამასობაში ამ თანხებს წინასაარჩევნოდ იყენებდნენ ზონდერების და პროვოკატორების მოსასყიდად, საარჩევნო უბნებზე.
რატომ გადაწყვიტა გრიგოლ ლილუაშვილმა ჩივილი მხოლოდ ამ საკითხზე?! – მარტივი მიზეზებია. ჩვენი ინფორმაციით, ის გახდა საერთაშორისო გამოძიების საგანი. ჩვენ ვფიქრობთ, რომ, უახლოეს მომავალში, ამ ადამიანის წინააღმდეგ დაიწყება გამოძიება, როგორც მთავარი ე.წ. ,,კრიშა“ ამ ქოლ-ცენტრების, საიდანაც ძარცვავენ ევროკავშირის მოქალაქეებს.
მე დღეს დამატებით, ჩვენს პარტნიორებს, ევროპელ კოლეგებს ჩავაყენებ საქმის კურსში ოფიციალური წერილით. ასევე, ჩვენ დღეს ვითხოვთ გრიგოლ ლილუაშვილის მოსვლას პარლამენტში. შესაბამისი წერილით ფრაქცია ,,ნაციონალური მოძრაობიდან“ გაიგზავნება, რომ მობრძანდეს თავდაცვის და უშიშროების კომიტეტზე და კონკრეტულ კითხვებთან დაკავშირებით გაგვცეს პასუხები.
ასევე ჩვენ ვნახეთ პროპაგანდა, რომელიც ამოქოქა, პირდაპირი მნიშვნელობით, ,,ქართულმა ოცნებამ“ და მისმა პროპაგანდისტულმა არხებმა. ახლა გაახსენდათ ქოლ-ცენტრები. არადა, როცა კონკრეტულ მისამართებზე მივდიოდი, ვამხელდი, ვასაჯაროებდი დოკუმენტაციას არანაირი რეაგირება ამ მიმართულებით არ ჰქონიათ. მხოლოდ მას შემდეგ ანერვიულდნენ, რაც ბატონი ლილუაშვილი, უჩა მამაცაშვილი და სავარაუდოდ, ბიძინა ივანიშვილითაც დაინტერესდნენ გამომძიებლები, რომლებიც უკვე რამდენიმე თვეა იმყოფებიან საქართველოში. ვგულისხმობ, გერმანელ, ფრანგ სამართალდამცავებს“, – განაცხადა ლევან ხაბეიშვილმა.
ავტორი
ნინი ხიჯაკაძე
