მიხეილ სააკაშვილს კონკრეტული მოთხოვნები აქვს, რომელთა შეუსრულებლობის შემთხვევაში იგი აპირებს მიმართოს პროტესტის უკიდურეს ფორმას. კერძოდ, საქართველოს მე-3 პრეზიდენტი ითხოვს, რომ ადვოკატებთან კონფიდენციალური შეხვედრის შესაძლებლობა ჰქონდეს და ასევე მისი ჯანმრთელობის შემოწმებისა და მკურნალობის საშუალება მიეცეთ ალტერნატიული კონსილიუმის წევრებსა და უცხოელ ექიმებს. აღნიშნულთან დაკავშირებით ტელეკომპანია “იმედის” ჟურნალისტთან კომენტარში შეფასებები გააკეთა “ქართული ოცნების” ერთ-ერთმა ლიდერმა, საპარლამენტო უმრავლესობის წევრმა ირაკლი ზარქუამ:
“მგონია, რომ ეს ადამიანი ისევ მოწყვეტილია რეალობას, ისევ ჰგონია თავი იმპერატორი, ალბათ ან მეფე და ჰგონია, რომ ბრძანებებს, რასაც იმ 9 წლის განმავლობაში გასცემდა, ახლაც ასე შეუსრულებენ.
რეალობა კი ის არის, რომ უკვე თვითონ დარჩა აი ამ, თავის მიერ შექმნილ, ილუზიაში, თორემ ის მიმდევრებიც შეწყვეტდნენ შიმშილობას, მილევად რეჟიმში არიან და რაც უფრო სწრაფად გააცნობიერებს ბელადი, რომ ის არის პატიმარი, რომ ის იხდის სასჯელს სამართლიანად, მისთვისაც უკეთესი იქნება და მისი მიმდევრებისთვისაც და ყველა დაისვენებს, ქვეყანაც დაისვენებს,” – განაცხადა ირაკლი ზარქუამ.
