ოპოზიციის პერმანენტული საპროტესტო აქციები გრძელდება. ,,ერთიანი ნაციონალური მოძრაობის“ თავმჯდომარემ, ნიკა მელიამ ბრიფინგზე განაცხადა, რომ ხელისუფლების მხრიდან მიხეილ სააკაშვილის ღირსების და ჯანმრთელობის აბუჩად აგდების ფაქტმა მთელ მსოფლიოს დაანახა საქართველოს ოლიგარქიული რეჟიმის სახე. ამასთან, ოპოზიციონერი ლიდერი აანონსებს მორიგ აქციას ხვალ, 13 ნოემბერს 17:00 საათზე პარლამენტის მიმდებარე ტერიტორიაზე:
,,მიმდინარე დღეებმა უჩვენა, რომ ჩვენი უწყვეტი, არაძალადობრივი პროტესტის ფონზე ხელისუფლება, რეჟიმი საბოლოოდ კარგავს სახეს და უშვებს თავისთვის მომაკვდინებელ შეცდომებს. სულ უფრო და უფრო ძლიერდება საერთაშორისო რეაქცია მიხეილ სააკაშვილის მხარდასაჭერად. მისი ღირსებისა და ჯანმრთელობის აბუჩად აგდებამ საქართველოს ოლიგარქიული რეჟიმი მთელი მსოფლიოს თვალში წარმოაჩინა ველურ და არაცივილიზებულ მმართველობად.
ახლა ჩვენ უნდა გავაგრძელოთ ყოველდღიურად არაძალადობრივი წინააღმდეგობრივი პროტესტი და ვარყიოთ რეჟიმი ასე სანამ ის არ ჩამოინგრევა!
ამ საერთაშორისო სწორ, ადეკვატურ, მზარდ რეაქციას ასევე, რა თქმა უნდა, აძლიერებს ჩვენი უწყვეტი, თანმიმდევრული და ორგანიზებული პროტესტი.
ამიტომ ხვალ, ძვირფასო მეგობრებო, ვისთვისაც სულერთი ნამდვილად არ არის და ასეთი ადამიანი ამ ქვეყანაში, როგორც უკანასკნელმა დღეებმაც დაადასტურა, არის აბსოლუტურ უმრავლესობაში. გელოდებით 17:00 საათზე რუსთაველის გამზირზე, პარლამენტის მიმდებარე ტერიტორიაზე“, – განაცხადა ნიკა მელიამ.
ავტორი
ნინი ხიჯაკაძე
