პარლამენტის ყოფილი დეპუტატი, ოპოზიციონერი პოლიტიკოსი ზურაბ ჭიაბერაშვილი სოციალურ ქსელში გამოქვეყნებული პოსტებით შეფასებას აძლევს ქვეყანაში მიმდინარე პოლიტიკურ პროცესებს და საპროტესტო მუხტის აწევის კონკრეტული მაგალითები მოჰყავს საქართველოს უახლესი ისტორიიდან:
“არანაირი სასოწარკვეთა და უიმედობა!
საღი აზრის მქონე ყველა ადამიანს ესმის, რომ მინიმუმ 15%-იანი ადმინისტრაციული უპირატესობის ფონზე 1-2%-ით ამხელა ქალაქების “მოგება” რეჟიმისათვის მოგება არაა.
ამიტომ:
1. მადლობა ამომრჩეველს. თქვენი შემართებაა, რაც ნიღაბს ხსნის რეჟიმს. ყოველ ეტაპზე ნიღაბის სულ უფრო მეტად ჩამოხსნა კი აუცილებელია ამ უთანასწორო ბრძოლაში;
2. მადლობა სააკაშვილს, რომლის თავგანწირვამ შექმნა ბრძოლის ახალი ენერგია;
3. მადლობა ათასობით პარტიულ და სამოქალაქო აქტივისტს, რომელიც უმძიმეს ფსიქოლოგიურ გარემოში ატარებს თითქმის 24 საათს, რომ თქვენი ხმა დაიცვას;
4. მადლობა მედიას, რომლის შემართება ფასდაუდებელია;
5. მადლობა ოპოზიციის ლიდერებს. მათ ამომრჩეველს შესთავაზეს ერთიანობა, მრავალფეროვნება და პოზიტიური დღის წესრიგი. ვინც ამ კამპანიის ფონზე ისევ ცხვირს აიბზუებს “ოჰ, ეს ოპოზიცია”, იცოდეთ, რომ უიმედო ქოცია – ან ბოღმას ვერ სძლევს, ან რეჟიმი მატერიალურად აწყობს.
გაითვალისწინეთ:
1. ისწავლეთ ემოციების მოთოკვა. ამ ბრძოლაში ყველაზე მთავარი დისციპლინაა. რეჟიმის ტროლ-ბოტები, ერთ მხარეს, უიმედობას და სასოწარკვეთას წაახალისებენ, მეორე მხარეს, რადიკალურ ქმედებებს;
2. ენდეთ, მოუსმინეთ, დაუჯერეთ პოლიტიკურ ლიდერებს. მათ უკვე გაჩვენეს, ბრძოლა შეუძლიათ. თქვენმა ზედმეტმა გულის შფოთვამ და გონების ჭმუნვამ შეიძლება უფრო ზიანი მოიტანოს, ვიდრე სარგებელი;
3. თქვენს გონიერებაზე, ემოციების მოთოკვასა და დისციპლინირებულობაზეა დამოკიდებული მიტაცებული სახელმწიფოს გამოხსნაც და სააკაშვილის გადარჩენაც,” – წერს ფეისბუქის პირად გვერდზე ზურაბ ჭიაბერაშვილი.
ამასთან ოპოზიციონერი პოლიტიკოსი საქართველოს უახლესი ისტორიაში შემდგარ ფართომასშტაბიან აქციებს იხსენებს და აცხადებს, რომ ხელისუფლების წინააღმდეგ ყველა დიდი საპროტესტო გამოსვლები არასაარჩევნო წელს ფიქსირდებოდა:
“არასაარჩევნო პერიოდი ხელისუფლების თავზე დაკიდებული “დამოკლეს მახვილია”.
ყველა დიდი საპროტესტო გამოსვლა ხელისუფლების წინააღმდეგ მოხდა არასაარჩევნო წელს:
2001 (28 ოქტომბერი) – (განმარტება ახალგაზრდებისთვის: კახა თარგამაძის გადაყენება მოჰყვა);
2007 (7 ნოემბერი);
2009 (კარვები);
2011 (26 მაისი);
2019 (20 ივნისი).
რაშია ლოგიკა?
არჩევნები განმუხტვის მექანიზმია.
როდესაც გახაფხულზე უკმაყოფილო ხარ, მაგრამ იცი, რომ შემოდგომაზე არჩევნებია, ცვლილებას ამ არჩევნებს უკავშირებ. როდესაც ჰორიზონტზე არჩევნები არ ჩანს, ფიქრობ, “აუ, კიდევ X წელი (თუნდაც 1 წელი) რა მოიცდის“.
ეს ეფექტი იყო 2019 წლის 20 ივნისაც, ხალხი ქუჩაში რომ გამოვარდა.
ჰოდა, როგორ წარმოგიდგენიათ, რომ მომდევნო 3 წელი არჩევნები არ იყოს?
ამიტომ დამშვიდდით და თბილი ტანსაცმელი და საწვიმრები მოიმარაგეთ,” – აღნიშნავს ზურაბ ჭიაბერაშვილი.
