“ხელისუფლება ფაქტობრივად წირავს მიხეილ სააკაშვილს!” – დიმიტრი საძაგლიშვილი

საქართველოს მე-3 პრეზიდენტის ჯანმრთელობის მდგომარეობა შიმშილობის გამო თანდათან უარესდება. ადვოკატი დიმიტრი საძაგლიშვილი ჟურნალისტებთან კომენტარისას აღნიშნავს, რომ მიხეილ სააკაშვილის ჯანმრთელობის მდგომარეობის მკვეთრი გაუარესება ნებისმიერ დროს არის მოსალოდნელი. ხოლო მმართველი ხელისუფლება გადაწყვეტილებას იღებს პოლიტიკური გზით:

,,მიხეილ სააკაშვილის ანალიზებში ერთ-ერთი სასიცოცხლო მაჩვენებელი დაეცა კრიტიკულ ზღვრამდე. საჭირო გახდა რეანიმატოლოგთა ჩარევა, რის შემდეგაც დასტაბილურდა ეს მაჩვენებელი.

ახლა შიმშილობის ისეთ ფაზაში შედის მე-3 პრეზიდენტი, რომ ნებისმიერ დროს არის მოსალოდნელი ჯანმრთელობის მდგომარეობის მკვეთრი გაუარესება. შესაბამისად, დღის წესრიგში დადგება დაუყოვნებლივი სამედიცინო სერვისის გაწევა.

აშკარაა, რომ იუსტიციის სამინისტრო არ ასრულებს კონსილიუმის მიერ გაცემულ რეკომენდაციას.

გადაწყვეტილების მიღება იმაზე დაყრდნობით კი არ ხდება, სად უკეთესად იქნება შესაძლებელი მკურნალობა, არა! – პოლიტიკური გადაწყვეტილების მიღება ხდება და ამით ხელისუფლება ფაქტობრივად წირავს მიხეილ სააკაშვილს!“, – განაცხადა დიმიტრი საძაგლიშვილმა.

ავტორი
ნინი ხიჯაკაძე