ორმა ოპოზიციურმა პოლიტიკურმა პარტიამ ,,დროამ“ და ,,ლელომ“ კოალიციური თანამშრომლობის შესახებ მემორანდუმს მოაწერეს ხელი. როგორც ელენე ხოშტარია სიტყვით გამოსვლის დროს აცხადებს, ამ ეტაპზე მთავარი პასუხისმგებლობა არის იმის გაგება, რა გადაარჩენს ამ ქვეყანას და რა გააჩენს რწმენას:
,,დღეს, როდესაც ადამიანის ღირსება ჩვენ ქვეყანაში არის გათელილი, ჩვენი დასავლური არჩევანი არის სერიოზული საფრთხის ქვეშ, ინსტიტუტები პრაქტიკულად არ არსებობს, არის დაკარგული მომავლის რწმენა, რაც მთავარია, ,,ქართული ოცნება“ ცდილობს, რომ ჩვენი საზოგადოება, მოქალაქეები გახლიჩოს და ერთადერთი, რაც ამ ქვეყანაში გვესმის და ვგრძნოთ ეს არის ზიზღი და დაპირისპირება. ეს არის სრულიად დამანგრეველი და არ არსებობს მოგებული ზიზღსა და დაპირისპირებაში, როდესაც ეს დომინირებს ჩვენს საზოგადოებაში.
ამ მომენტში, ჩვენ – პოლიტიკოსებს, პოლიტიკურ ჯგუფებს, მოქალაქეებს გვაქვს განსაკუთრებული პასუხისმგებლობა. ეს არ არის უბრალოდ ან ეკრანებთან პრანჭვა, ან არჩევნებში მონაწილეობის მიღება – ეს პასუხისმგებლობა არის კარგად დაფიქრება, თუ რა გადაარჩენს ამ ქვეყანას, რა გააჩენს რწმენას იმისა, რომ დიახ, ჩვენ, საქართველოს მოქალაქეები ვართ ის ხალხი, რომელსაც გვაქვს უნარი, ავაშენოთ ერთიანი ეროვნული თანხმობით პროდასავლური ცივილიზებული მშვიდობიანი სახელმწიფო.
დღეს ეს გადის 2 რამეზე: ეს არის ერთობა და ეს არის კოალიციური მრავალფეროვნება! ჩვენ ბევრი ვისწავლეთ ამ 30 წლის განმავლობაში, რომ ერთპარტიული, ერთ ადამიანზე მორგებული სისტემა, კარგი მიზნებითაც მოსული კი ღუპავს და ძალიან ბევრ შეცდომას აშვებინებს ქვეყანას.
ამიტომ ჩვენ: ,,დროამ“, მე ძალიან მიხარია, რომ ,,ლელომ“ და დარწმუნებული ვარ, რომ სხვა პროდასავლური პარტიები ამ არჩევანს ვაკეთებთ ერთობისთვის, ერთიანი ბრძოლისთვის და ამასთანავე მრავალფეროვნებისთვის და განსხვავებებისთვის’’, – განაცხადა ელენე ხოშტარიამ.
ავტორი
ნინი ხიჯაკაძე
