“მესამე ძალა-სტრატეგია აღმაშენებელმა” თბილისის განვითარების გეგმა წარადგინა. ოპოზიციური პარტიის თბილისის მერობის კანდიდატმა თამარ კეკენაძემ ხაზგასმით ისაუბრა იმ ამოცანებსა და პრიორიტეტებზე, რომელიც პარტიას მიზნად აქვს დასახული ქალაქის განსავითარებლად:
“2 ოქტომბერს „მესამე ძალა – სტრატეგია აღმაშენებლის“ მთავარი პოლიტიკური ამოცანაა დავიწყოთ ბიძინა ივანიშვილის „ქართული ოცნების“ ცვლილება, მაგრამ ამ პოლიტიკურ ამოცანასთან ერთად ჩვენ დავიწყეთ დისკუსია თბილისელებთან ერთად თუ როგორ გავხადოთ თბილისი განვითარებული ქალაქი, როგორ შევძლოთ, რომ მათ იცხოვრონ ღირსეულად, მათი ცხოვრება დაცული იყოს თბილისში და შეძლოთ საკუთარი შესაძლებლობების რეალიზაცია. ჩვენი ინოვაციური პაკეტი და ის გეგმები, რომელიც ჩვენ გვაქვს ემსახურება სამ ამოცანას: ახალი სამუშაო ადგილების შექმნა, საშუალო ხელფასის გაზრდა, განვითარების პირობების შექმნა მცირე და საშუალო ბიზნესისთვის.
დედაქალაქთან მიმართებაში დღეს წარმოგიდნეთ 6 ძირითად პრიორიტეტს:
პირველი არის – თანაბრად განვითარებული ქალაქი, ეს გულისხმობს, რომ ყველა უბანი თბილისში, ეს ცენტრია თუ პერიფერია უნდა გახდეს ქალაქის სახე.
მეორე – თბილისი უნდა იქცეს ცოდნისა და ტექნოლოგიების ცენტრად მთელს რეგიონში, არა მხოლოდ სამხრეთ კავკასიაში, არამედ შავი ზღვის რეგიონში, რათქმაუნდა ეს არის ძალიან ამბიციური გეგმა, მაგრამ ჩვენ გვაქვს კონკრეტული ხედვა მიზნის მისაღწევად.
მესამე – თბილისი უნდა იყოს კომფორტული და უსაფრთხო ქალაქი, როგორც ჩვენი მოქალაქეებისათვის ასევე ტურისტებისთვის.
მეოთხე – თბილისი უნდა იქცეს ევროპის ტურისტულ და კულტურულ ცენტრად და ჩვენ ეს ქალაქი თავიდან უნდა გავაცოცხლოთ, ჩვენ გვაქვს ძალიან მნიშვნელოვანი გეგმები კოვიდ პანდემიის მიუხედავად თუ როგორ დავაბრუნოთ სიცოცხლე ქალაქში.
მეხუთე – თბილისი უნდა იყოს გლობალური საჰაერო, სატრანზიტო ჰაბი. სამწუხაროდ დღეს თბილისი და საქართველო ვერ იყენებს იმ ეკონომიკურ პოტენციალს, რომელიც ქალაქს და ქვეყანას გააჩნია.
ბოლოს კი – ძირითადი პრინციპი ქალაქის თანამონაწილეობითი მართვა, რომლითაც ვაპირებთ ვმართოთ თბილისი” – განაცხადა თამარ კეკენაძემ.
ინფორმაციას პოლიტიკური პლატფორმა “გიორგი ვაშაძე – მესამე ძალა – სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს
