თბილისში, ავსტრიელი პედაგოგის, შანაი ბრუკის მკვლელობის საქმეზე რაფაელ მურსაკულოვს პროკურატურამ მკვლელობის ბრალდების გარდა ყაჩაღობაშიც წაუყენა ბრალი. ბრალდებულის ადვოკატმა დროებითი მოთავსების იზოლატორში დაკავებულის მონახულების შემდეგ მედიასთან კომენტარი გააკეთა და აცხადებს, რომ მისი დაცვის ქვეშ მყოფი კვლავ იყენებს დუმილის უფლებას. ადვოკატი სოფიო გოგლიჩიძე აღნიშნავს, რომ გამოძიებას ბრალდებულთან მიმართებაში ჯერ კიდევ აქვს ჩასატარებელი კონკრეტული საგამოძიებო საქმიანობა:
,,წაუყენეს ჩემ დაცვის ქვეშ მყოფს უკვე ბრალი. ეს არის საქართველოს სისხლის სამართლის კოდექსის 179 მუხლის 1 ნაწილი, 109 მუხლის 1 ნაწილის ,,გ“ ქვეპუნქტი და მე-3 ნაწილის ,,გ“ ქვეპუნქტი.
რაც შეეხება მის პოზიციას, მოგახსნეთ უკვე, რომ იგი დუმილის უფლებას იყენებს, მაგრამ წარდგენილ ბრალდებაში თავს არ ცნობს დამნაშავედ. აცხადებს, რომ არანაირი შეხება მას ამ საქმესთან არ ჰქონია.
ბრალშიც ისეთი მოწმეები არის ჩამოთვლილი, რომ ფიზიკურად შემხებლობაში არავინ არ არის, მომსმენი არავინ არის, სატელეფონო ჩანაწერი არ არის, არანაირი ანძებით ეს არ მტკიცდება. ფაქტია, მოხდა რაღაც, მაგრამ მას რა შემხებლობა აქვს ამ საქმესთან ეს უკვე სხვა საკითხია.
იმ პიროვნებასთან, იმ გარდაცვლილთან, იმ ტერიტორიაზე მას არანაირი შეხება არ ჰქონია. ის სახლში იმყოფებოდა მთელი დღის განმავლობაში. ისეთ ადგილზე არ გადაადგილებულა, რომ მისთვის აი, თუნდაც გამოძიებამ ვერ დაადგინოს სად იმყოფებოდა. დაადგინოს გამოძიებამ სად იმყოფებოდა, სად გადაადგილდებოდა და იმის შემდეგ შეუძლიათ უფრო კონკრეტულად, სიღრმისეულად დადონ მას ბრალი“, – განაცხადა სოფიო გოგლიჩიძემ.
ინფორმაციისთვის: თბილისის საქალაქო სასამართლომ ბრალდებულ რაფაელ მურსაკულოვს 2-თვიანი წინასწარი პატიმრობა შეუფარდა.
ავტორი
ნინი ხიჯაკაძე
