სამოქალაქო პლატფორმა 20/20-მა 2021 წლის 2 ოქტომბრის ადგილობრივი თვითმმართველობის არჩევნებისთვის საოლქო საარჩევნო კომისიების დროებითი წევრების არჩევის შესახებ არაგეგმური ანგარიში მოამზადა.
სამოქალაქო პლატფორმა 20/20 მიიჩნევს, რომ საოლქო კომისიების დროებთი წევრების შერჩევისას ცენტრალურმა საარჩევნო კომისიამ არასათანადო ყურადღება დაუთმო კანდიდატთა პროფესიონალიზმისა და მიუკერძოებლობის შესწავლას. მათ შორის შერჩეული იქნა ისეთი ადამიანები, რომლებიც არიან პოლიტიკური გაერთიანება ქართული ოცნების შემომწირველები და ასევე, შეირჩა წევრები, რომელთა მიმართაც 2020 წლის საპარლამენტო არჩევნების დროსაც ადგილობრივი სადამკვირვებლო ორგანიზაციების მიერ მიუკერძოებლობასთან დაკავშირებით არსებობდა კითხვის ნიშნები.
ცენტრალურმა საარჩევნო კომისიამ 219 ვაკანტურ ადგილზე კენჭისყრის პირველ ეტაპზე, სადაც აუცილებელი იყო მინიმუმ 12 კომისიის წევრის მხარდაჭერა, აირჩია 98 საოლქო კომისიის წევრი. აქედან, მინიმალური, 12 კომისიის წევრის მხარაჭერა მოიპოვა 73-მა კანდიდატმა (74%). საინტრესოა, რომ პირველ ეტაპზე არჩეულ კანდიდატებს ასევე 100%-ით მხარი დაუჭირეს პოლიტიკური გაერთიანება „ალეკო ელისაშვილი – მოქალაქეების“ და „ევროპელი სოციალისტების“ კომისიის წევრებმა, პროფესიული ნიშნის კომისიის წევრებთან და პოლიტიკური გაერთიანება „ქართული ოცნება – დემოკრატიური საქართველოს“ წევრთან ერთად.
ზემოთ მოყვანილი მონაცემების ანალიზიდან ჩნდება ერთგვარი ტენდენცია, რომელიც ქმნის განცდას, რომ კომისიის უმეტესი წევრების მოქმედება გამოწვეული იყო წინასწარ შეთანმხებული მეთოდოლოგიიდან გამომდინარე.
სამოქალაქო პლატფორმა 20/20 მოუწოდებს ცენტრალურ საარჩევნო კომისიას, გადახედოს მოსახლეობის ინფორმირების პრაქტიკაში მათ მიერ გამოყენებულ მეთოდებს, სამომავლოდ იზრუნოს არსებული მექანიზმის დახვეწაზე, საოლქო საარჩევნო კომისიების წევრების შერჩევისას გამორიცხოს ნეპოტიზმის შემთხვევები და ყურადღება გაამახვილოს კანდიდატების კვალიფიკაციასა და მიუკერძოებლობაზე.
