,,ქართული ოცნების“ მიერ თბილისში ჩატარებული კვლევის თანახმად 46% აქვს მმართველ გუნდს, 23% ,,ნაციონალურ მოძრაობას“. აღნიშნულ კვლევაზე შეფასებები გააკეთეს ოპოზიციური სპექტრის წარმომადგენლებმა, რომლებიც მიიჩნევენ, რომ ეს ციფრები არ ასახავს რეალობას:
,,პირველ ადგილზე რომ ,,ქართული ოცნება“ გავა ახლა ეს ფაქტია. 46%-ს აიღებს თუ 43%-ს არვიცი ნამდვილად, რაღაც მკითხაობა გამოვა ჩემგან და არ მინდა ლელა კაკულიას შევეცილო თავის როლში.
ერთ რამეში დარწმუნებული ვარ, რომ ჩვენი გუნდი თბილისში, სადაც ჩვენი პოზიციები გაცილებით ძლიერია, კარგ შედეგს აჩვენებს და ჩვენ საკრებულოში, დარწმუნებული ვარ, რომ გავიყვანთ რამდენიმე ძალიან კვალიფიციურ და წესიერ ადამიანს, რომელიც მთელი შემართებით მოემსახურება ქალაქს“, – განაცხადა პარლამენტის პოლიტიკური ჯგუფის ,,მოქალაქეების“ თავმჯდომარემ ალეკო ელისაშვილმა.
,,ქართული ოცნების“ შიდა კვლევები არის კვლევის კვლევით გადაფარვის მცდელობა. ძალიან უცნაურია, როდესაც ,,ქართულ ოცნებას“ დაუწერა თავად ,,ოცნებამ“ 46% და კახა კალაძეს 66%. ანუ რა გამოდის?! – მმართველი გუნდის აღიარებით კალაძეს 20%-ით მეტი აქვს რეიტინგი, ვიდრე ,,ოცნებას“. ისინი წერენ და კითხულობენ და ქართველი ხალხი 2 ოქტომბრის რეფერენდუმზე მივა და გააკეთებს არჩევანს!“ – განაცხადა ,,ნაციონალური მოძრაობის“ წევრმა ნიკა ობოლაძემ.
,,ქართული ოცნების“ გარდა ჩვენც ვატარებთ შიდა პარტიულ კვლევებს და იქ ასეთი მონაცემები არ არის! 30%-ზე მეტს ვერ იღებს მმართველი გუნდი – ჩვენი და სხვა ოპოზიციური პარტიების შიდა პარტიული კვლევებით. ახლა თავის თავს თუ დაიმშვიდებს ,,ქართული ოცნება“ 46% კი არა 96% ჩაწეროს, უფრო მშვიდად იქნებიან!“, – განაცხადა ,,სტრატეგია აღმაშენებელის“ პოლიტიკური საბჭოს წევრმა სერგო ჩიხლაძემ.
ავტორი
ნინი ხიჯაკაძე
