საქართველოს პრემიერ-მინისტრმა ირაკლი ღარიბაშვილმა ამომრჩევლებთან შეხვედრისას ისევ “ნაციონალური მოძრაობის” ხელისუფლების შეცდომებზე ისაუბრა, მათ შორის 2008 წლის აგვისტოს ომთან მიმართებაში და აღნიშნა, რომ ეს არის ერთადერთი ხანგრძლივი, 8 წლიანი პერიოდი, როცა საქართველოს არ ჰქონია ომი, ხოლო ის მმართველი, რომელიც ვერ შეძლებს ომის თავიდან აცილებას, არ არის ღირსი დაბრუნდეს პოლიტიკაში:
,,2008 წლის აგვისტოს ომის გამოუსწორებელი შედეგი, მართლაც ძალიან მძიმე აღმოჩნდა ჩვენი ქვეყნისთვის. ომის არის ყველაზე დიდი საშინელება, მეგობრებო. ხელისუფლება, რომელიც ვერ ააცილებს საკუთარ ხალხს და ქვეყანას ომს – ის ხელისუფლება, ის პოლიტიკოსი, ის მმართველი არ იმსახურებს არა თუ ხელისუფლებაში დარჩენას და დაბრუნებას, არამედ პოლიტიკაში დარჩენას.
ჩვენი გუნდი, ,,ქართული ოცნება არის“ ერთადერთი ის პოლიტიკური ძალა, რომელმაც შეძლო, კიდევ ვიმეორებ, ხანგრძლივი მშვიდობის, სტაბილურობის და განვითარების შემოტანა ჩვენს ქვეყანაში.
ეს არის ერთადერთი ხანგრძლივი, 8 წლიანი პერიოდი, როცა ჩვენს ქვეყანას საბედნიეროდ არ ჰქონია ომი.
ჩვენ ვართ მართლაც ხალხზე ორიენტირებული ხელისუფლება და მთავრობა. შეცდომები განა არ მოგვდის?! – მოგვდის შეცდომები, რა თქმა უნდა, მაგრამ ეს არის შეცდომები!
,,ქართულ ოცნებას“ ალტერნატივა არ აქვს საქართველოში! ჩვენ შეგვიძლია მართვა, პასუხისმგებლობის აღება თითოეულ ჩვენს მოქალაქეზე, ჩვენი ქვეყნის, ხალხის ბედზე.
ჩვენ ძლიერად უნდა გავიმარჯვოთ არჩევნებზე. უნდა დავასტაბილუროთ ქვეყანა. მომდევნო 3 წელი უნდა იყოს განვითარების წლები.
ჩვენ ყველაფერი, მაქსიმუმი უნდა გავაკეთოთ ჩვენი მოქალაქეებისთვის. 2024 წელს კიდევ უფრო ძლიერად უნდა შევხვდეთ საპარლამენტო არჩევნებს“, – განაცხადა ირაკლი ღარიბაშვილმა.
ავტორი
ნინი ხიჯაკაძე
