“დაანონსებული იყო პირდაპირ – სახელმწიფო აღარ არსებობს, მელია არის მთავარი, ვინც ქმნის სახელმწიფოში კანონებს და სააკაშვილი – ვინც მართავს პოლიტიკურ სიტუაციას“ – გიორგი ვოლსკი

პარტია ,,ქართული ოცნება – დემოკრატიული საქართველოს“ თავმჯდომარემ, ირაკლი კობახიძემ, ,,რუსთავი 2“-ის ეთერში, ყოფილი პრემიერ-მინისტრ გიორგი გახარიასა და ყოფილი პრეზიდენტის მიხეილ სააკაშვილის ინტერესების დამთხვევის შესახებ საუბრობდა და გამოთქვა მოსაზრება, რომ ქვეყანაში მათი მხრიდან დესტაბილიზაცია იგეგმებოდა. აღნიშნულ საკითხს გამოეხმაურა პარლამენტის თავმჯდომარის პირველი მოადგილე გიორგი ვოლსკი და კონკრეტულ შეფასებებს აკეთებს ნიკა მელიას დაკავების ოპერაციასთან დაკავშირებით:

,,ის ორი დღე, როდესაც სახელმწიფო სტრუქტურების ჩამოშლა დააანონსა ,,ნაციონალურმა მოძრაობამ”, სწორედ იმ 2 დღეს ითხოვდა გახარია ოპერაციის ჩასატარებლად. ყველამ დავინახეთ ის მიზეზი, რომ რაოდენობა შემცირდებოდა ან მოდუნდებოდა, ნამდვილად არ დადასტურდა.

საკმაოდ დაძაბული სიტუაცია იყო, როდესაც დაანონსებული იყო პირდაპირ, სახელმწიფო აღარ არსებობს და მელია არის მთავარი, ვინც ქმნის სახელმწიფოში კანონებს და სააკაშვილი, ვინც მართავს პოლიტიკურ სიტუაციას.

ყველა ნაბიჯი, მათ შორის, გადადგომაც, რასაკვირველია, დაემთხვა იმ ინტერესს, რომელზეც უკვე ღიად დაიწყეს საუბარი ,,ნაციონალური მოძრაობის“ ბანაკიდან ალამუთის ციხესიმაგრემდე.

ეგეთი აზრი გაჩნდა მაშინვე, როგორც კი აი ასეთი გააფთრებული მოთხოვნის შემდეგ, აუცილებლად მოხსნოდა იმუნიტეტი მელიას, ამის შემდეგ რადიკალური ცვლილება იმჟამინდელ პრემიერ-მინისტის დამოკიდებულებაში ამ საკითის მიმართ არის საკმაოდ სოლიდური საფუძველი იმისთვის, რომ გაჩნდეს და გამყარდეს ის მოსაზრებები, რაზედაც ირაკლი კობახიძემ ისაუბრა.ირაკლი კობახიძე დამადასტურებელი ფაქტების თაობაზე უახლოეს მომავალში კვლავ გააკეთებს განცხადებას. მათ შორის, დაფინანსების წყაროებზე“, – განაცხადა გიორგი ვოლსკიმ.

შეგახსენებთ, რომ “რუსთავი 2”-ის ეთერში ირაკლი კობახიძემ კონკრეტული მოსაზრებები გამოთქვა გახარიასა და სააკაშვილთან მიმართებაში:

,,18 თბერვალს უკვე ვერ დაკავების საბაბით, ისინი აცხადებდნენ ე.წ. ალტერნატიულ მთავრობას, თავისი ე.წ. ძალოვანი მინისტრებით. ეს არის ინფორმაცია, რაც ჩვენ გვქონდა კიევიდან. მათ ჰქონდათ გამზადებული სცენარი. ჰყავდათ ადამიანები შინაგან საქმეთა სამინისტროში, თავდაცვის სამინისტროში, რომლებიც აკეთებდნენ განცხადებას ალტერნატიული მთავრობისა და ძალოვანი სტრუქტურების დაქვემდებარებაში გადასვლის თაობაზე.

იქიდან ამბობენ, რომ 2-3 დღე გვჭირდება და ავაყირავებთ ხელისუფლებას და აქ ითხოვს, ჩვენი გუნდის ერთ-ერთი ლიდერი გაუგებარი მოტივით 2-3 დღით ოპერაციის გადადებას.

როგორც კი დამთხვევა დავაფიქსირეთ, მაშინვე, ბუნებრივია, გაჩნდა ეჭვი და შესაბამისად აღარ გავანდეთ მათ ეს ინფორმაცია“, – განაცხადა ირაკლი კობახიძემ ,,რუსთავი 2“-ის ეთერში.

ავტორი
ნინი ხიჯაკაძე