ეკატერინე ტიკარაძემ ვაქცინაციის პროცესის შეფასებებთან ერთად 27 წლის ახალციხელი მედდის გარდაცვალების თაობაზეც გააკეთა კომენტარი და აღნიშნა, რომ საკითხს ორშაბათის საგანგებო სხდომაზე გაეცემა პასუხი:
„ფაიზერი გამოიკვეთა, როგორც ყველაზე მეტად ტრენდული ვაქცინა, თუმცა როგორც მსოფლიო ჯანდაცვის ორგანიზაცია და ასევე მკაცრი მარეგულირებლები აცხადებენ, რომ ყველა ვაქცინა არის ერთნაირად მაღალი სარგებლის მომტანი და მათი მხრიდან მოტანილი ზიანი ბევრად უფრო დაბალია.
დარწმუნებული ვარ, რომ საქართველოში მომხდარი უბედური შემთხვევის ფაქტთან დაკავშირებით ყველა კითხვას პასუხი გაეცემა. ჩვენ მოგვეცემა საშუალება, მოქალაქეებს დარწმუნებით ვაცნობოთ იმის შესახებ, რომ ამ უბედური შემთხვევის გამომწვევი მიზეზი არ ყოფილა ვაქცინა.
არსებობს გარკვეული წინასწარი ინფორმაცია იმის თაობაზე, რომ პირდაპირ გამომწვევ მიზეზად შესაძლებელია არ დასახელდეს ვაქცინა. ჩვენ ველოდებით სამხარაულის დასკვნას და ორშაბათს, ჯანდაცვის სამინისტროში გაიმართება საგანგებო სხდომა, რომელზეც იქნება წარმოდგენილი რეგულირების სააგენტო, როგორც მოპასუხე და ასევე წარმოდგენილი იქნება სამხარაულის ექსპერტიზის დასკვნა“, – აცხადებს ეკატერინე ტიკარაძე
