ტურიზმის სექტორის, სარესტორნო ქსელების, ბიზნესის წარმომადგენლების მხრიდან დაანონსებული პროტესტი, რომ იგეგმება ე.წ. დაუმორჩილებლობა და ბიზნესის თვითნებურად გახსნა, ეკონომიკისა და მდგრადი განვითარების მინისტრი, ნათია თურნავა ეხმიანება. მინისტრი არაკანონიერი ქმედებისგან თავის შეკავებისკენ მოუწოდებს ბიზნესის წარმომადგენლებს:
“კომუნიკაციის ნაკლებობა ნამდვილად არ არის. გარდა ამისა, ჩვენს სამინისტროს, ტურიზმის ადმინისტრაციას, პრაქტიკულად, ყოველდღიურ რეჟიმში აქვთ კომუნიკაცია ტურისტულ ინდუსტრიასთან, მათ შორის, რესტორნებთან ხან “ონლაინ”, ხან ფიზიკური შეხვედრით.
გასაგებია, იმის გამო, რომ რესტორნები, აჭარის გარდა სხვაგანაც, ჯერჯერობით, ვერ იხსნება და აქედან გამომდინარე, მათ აქვთ უკმაყოფილება, მაგრამ დაუმორჩილებლობა, კანონის დარღვევა, ეპიდემიოლოგიური წესების მიმართ დაუმორჩილებლობა არის მიუღებელი, ამას, რა თქმა უნდა, მოჰყვება მკაცრი რეაქცია. თუმცა, ვინაიდან ჩვენ, პრაქტიკულად ყოველდღიურ რეჟიმში, პრემიერ მინისტრთან და ეკონომიკურ გუნდთან ერთად ვიხილავთ, თუ როდის შეიძლება ჩვენ, იგივე აჭარის მოდელი (სადაც ჩვენ ღია სივრცეები გავხსენით) გადმოვიტანოთ დანარჩენ საქართველოზე და ვაკვირდებით ეპიდემიოლოგიურ ვითარებას და ვეძებთ გამოსავალს, აქედან გამომდინარე, ჩემი თხოვნა იქნება და იმედს გამოვხატავ, რომ რესტორნები ასეთი არაკანონიერი ქმედებით არ გაართულებენ დიალოგს ჩვენს შორის,” – განაცხადა ნათია თურნავამ.
